УИХ-ын чуулганы хуралдаан үргэлжилж байна. Үргэлжлүүлээд “Монгол Улсын хөгжлийн 2023 оны төлөвлөгөө батлах тухай” УИХ-ын тогтоолын төслийг хэлэлцэх эсэх асуудлыг хэлэлцэж байна.

Уул уурхай, хүнд үйлдвэрийн сайд Г.Ёндон газрын тосны үйлдвэрийн бүтээн байгуулалтын талаар мэдээлэл өгөхдөө "Газрын тос боловсруулах үйлдвэр дөрвөн багц ажил болон тусдаа дамжуулах хоолой гэсэн нийт таван багц ажлаас бүрдэж байна. Өгөөдрийн байдлаар Энэтхэгийн 178 хүн, туслан гүйцэтгэгч Монгол компанийн 387 хүн ажиллаж байна. Дамжуулах хоолойн тендерийн гэрээ байгуулагдаж, гарын үсэг зурсан. Бүтээн байгуулалтын ажил Таван-Уулын талбайгаас хийгдэх бөгөөд гэрээний дагуу 32 сарын хугацаанд бүтээн байгуулалтыг хийж дуусгана гэж заасан" гэлээ.

Энэ үеэр УИХ-ын дарга Г.Занданшатар "Гол нь газрын тос боловсруулах үйлдвэр 2024 онд ашиглалтад орох уу, та үүнийг толгойгоороо хариуцах уу" гэхэд Г.Ёндон "Толгойгоороо хариуцна" гэлээ.