Сар шинийн баярын өдрүүдэд Өмнөговь аймгийн Манлай суманд моринд даруулсан тархины хүнд гэмтэлтэй өвчтөнийг Улаанбаатарт нисдэг тэргээр тээвэрлэн авчрах алсын дуудлагад ГССҮТ-ийн Мэдээгүйжүүлгийн тасгийн их эмч Г.Ариунболд явж, эмнэлгийн яаралтай тусламж үзүүлжээ.

Тухайн иргэн тус эмнэлгийн Эрчимт эмчилгээний тасагт эмчлүүлж байна. Ямар тохиолдолд яаралтай тусламж үзүүлэхэд нисдэг тэрэг дууддаг вэ, нисдэг тэргээр тусламж үзүүлэх төсвийг хэрхэн шийддэг юм бол? Энэ талаар ГССҮТ-ийн Эмчилгээ эрхэлсэн орлогч захирал Р.Гантуяагаас тодруулахад, “Нисдэг тэргээр өвчтөн авчрах төсөв эмнэлэгт байхгүй. Сар шинийн баяраар гэмтсэн өвчтөнийг Өмнөговь аймгаас авчрах дуудлага манай эмнэлэгт ирсэн учир мэргэжлийн эмч яаралтай тусламжийн эм, тариа болон шаардлагатай зүйлсийг авч газар дээр нь тусламж үзүүлээд, өвчтөнийг Улаанбаатарт авчирч хэвтүүлэн эмчилгээ эхлүүлээд байна.

-Өвчтөнийг нисдэг тэргээр тээвэрлэхэд хэдий хэмжээний өртөг зардал гарсан бол?
-Хувь хүн зардлаа хариуцсан учир тэр талаар мэдэх зүйл алга. Эмнэлэг гаднаа нисдэг тэрэг буух талбайтай болж, хүнд өвчтөнийг нисдэг тэргээр авчирч яаралтай тусламж үзүүлж байгаа нь эмнэлгийн тусламж үйлчилгээнд гарч байгаа нэг дэвшил юм гэв.

Өнгөрсөн зун гэр бүлээрээ аяллаар явж байгаад осолдсон таван настай хүүхдийг Хэнтий аймгаас ЭХЭМҮТ-д нисдэг тэргээр тээвэрлэн авчирч байжээ.

Манай улсын хувьд гурав дахь шатлалын тусламж үзүүлдэг ГССҮТ, ЭХЭМҮТ, ХӨСҮТ гаднаа нисдэг тэрэг буух талбайтай болсон. Өнгөрсөн зун гэр бүлээрээ аяллаар явж байгаад осолдсон таван настай хүүхдийг Хэнтий аймгаас ЭХЭМҮТ-д нисдэг тэргээр тээвэрлэн авчирч байжээ. Энэ зардлыг мөн ар гэрийнхэн нь гаргасан бөгөөд тээврийн хөлс нь 16 сая төгрөг болсон гэх мэдээлэл байна.

Өргөн уудам газар нутагтай Монгол оронд эрүүл мэндийн ноцтой шалтгаанаас үүдэн өвчтөнийг автомашинаар тээвэрлэн доргиож болохгүй заалттай тохиолдол цөөнгүй гардаг. Ийм үед нисдэг тэргээр тээвэрлэх гарц бий болсон нь сайшаалтай.

Алсын дуудлагад нисдэг тэргээр явах тохиолдолд Эрүүл мэндийн даатгалаас ямар нэг хөнгөлөлт үзүүлдэг эсэхийг ЭМДЕГ-аас тодрууллаа.

Нисдэг тэргээр өвчтөн тээвэрлэж буй тохиолдолд Эрүүл мэндийн даатгалын сангаас үзүүлэх хөнгөлөлт байхгүй. Харин эмч дуудаж, алсын дуудлагаар явах тохиолдолд 70-450 км дотор 396 мянган төгрөг, 450 км-ээс дээш зайд бол 768 мянган төгрөгийг тусламж үзүүлсэн эмнэлэгт гүйцэтгэлээр нь санхүүжилт олгоно гэв.