"Ерөнхий сайд Н.Учралын хамаарал бүхий сургууль, цэцэрлэгүүд өнгөрсөн гурван жилийн хугацаанд төсвөөс 8.3 тэрбум төгрөгийн хувьсах зардал авсан байна" хэмээн Ардчилсан намын Олон нийттэй харилцах нарийн бичгийн дарга Г.Лхагвадорж гэлээ. Тэдгээр хувьсах зардлын талаар өнөөдөр (2026.09.21) мэдээлэл өглөө. 

“Ерөнхий сайдын хамаарал бүхий сургуульд 8.3 тэрбум төгрөгийн зардал олгогдсон гэх баримт байна. Л.Энх-Амгалан сайдын ярианаас үүдэж,  Н.Учрал сайдтай хамаарал бүхий сургууль, цэцэрлэгийг судалж, дараах тоог гаргасан.

Сүүлийн гурван жилийн хугацаанд хувьсах зардал нэртэй 6.5 тэрбум төгрөг "Тэмүжин", "Гоц жаалууд", "Тэмүжин анд" зэрэг цэцэрлэгийн дансанд орсон. Мөн ерөнхий боловсролын "Их засаг" лицей сургууль нэг тэрбум төгрөг авсан. "Их засаг" их сургууль болон "Рояал Академи"-д 1.8 тэрбум төгрөгийн санхүүжилт өгчээ. 

Ардчилсан намын зүгээс Ерөнхий сайдад итгэл хүлээлгэх шалтгаан танилцуулаач ээ гэсэн. Өөрсдийнх нь намын гишүүд болон Засгийн газарт хамтарч байгаа намынх нь гишүүд чуулганд ирж ирцээ бүртгүүлэхгүй байхад АН-ынхан гацааж байна гэдэг асуудлаа болих хэрэгтэй.

АН-ын дарга О.Цогтгэрэлтэй холбоотой асуудал бол  "ТЭСО групп" тус цэцэрлэгийг 5 тэрбум төгрөгийн хөрөнгө оруулалт хийж, 500 сая төгрөгөөр тохижуулж улсад ашиглуулж байна. Туршлагатай улс төрч байж Л.Энх-Амгалан сайд яагаад сөрөг хүчинд чиглэсэн худал мэдээлэл тарааж буйг гайхаж байна” хэмээлээ.