Ардчилсан намын "4:11 мэдээллийн цаг" ээлжит хэвлэлийн бага хурал өнөөдөр Төрийн ордонд боллоо. Уг хуралд УИХ-ын гишүүн С.Одонтуяа, Д.Энхтуяа, Ардчилсан намын дэд Дарга Ч.Өнөрбаяр, Нарийн бичгийн дарга Г.Лхагвадорж нар оролцлоо.

АН-ын дэд дарга Ч.Өнөрбаяр, Ерөнхий сайдын захирамжаар АН-ын ялсан цөөн Засаг дарга нарын нэг Баян-Өлгий аймгийн Засаг даргыг өчигдөр огцрууллаа. Бид Ерөнхий сайдын хууль бус шийдвэрийг цуцлуулахаар шүүхэд хандах болно. Монголын шүүх эрх баригч намын хуулийн хэлтэс болчихоогүй байх гэж бодож байна.

Эрх баригч намынхан улс төрийн салбарт хулгайн ан хийдгээ болиоч ээ. Сөрөг хүчнээ хүчгүйдүүлэхийн тулд эрх мэдэл, албан тушаалаа ашигладгаа болих хэрэгтэй. Жинхэнэ хариуцлага тооцох ёстой хүмүүс танай Засгийн газарт байна. Иргэдэд худлаа мэдээлэл өгөөч сууж байгаа сайд нар чинь байна.
Шатахууны үнэ нэмэгдэхгүй гэсэн хаана байна. Шатахууны нөөц хангалттай байгаа гэсэн хаана байна. Өгсөн бүх мэдээлэл нь худлаа.

Сайд нар нь сүүлдээ иргэдтэй нүүр тулж чадахаа больж, агентлагийн дарга нараа өмнөө барьдаг боллоо. Энэ сайд нартайгаа хэзээ хариуцлага тооцох вэ.

Эдийн засгийн хүндрэл, өвөлжилтийн хүндрэлийг хэрхэн давах, авлига хулгайн хэрэгт холбогдсон албан тушаалтнуудтайгаа хариуцлах тооцохын оронд сөрөг хүчнийхээ улстөрчдий намнаж байна. Та бүхэн буруу жишиг тогтоож байна. Гэхдээ энэ дээр АН зүгээр байхгүй, ЕС-ын хууль бус шийдвэрийг хүчингүй болгуулна.

Үүний дараа АН Ерөнхий сайдтай улс төрийн хариуцлага тооцох асуудлыг ярина. Энэ асуудлаар АН-ын Улс төрийн зөвлөл, УИХ дахь АН-ын бүлэг хамтарсан хурлууд хийнэ.

Ерөнхийлөгчийн сонгуулийн бэлтгэл ажилдаа МАН-ынхан хэт эрт орж байгаа юм байна. Монгол Улс сонгуулиас сонгуулийн хооронд амьдардаг биш, иргэдийнхээ асуудлуудыг шийдэх замаар урагшлах ёстой. 

Аливаа зүйлийг хүчээр хийдэг та бүхний арга барил хоцрогдсон. Та бүхэн Ерөнхийлөгчийн сонгуульд ялалт байгуулна гэж бодож байвал том эндүүрэл шүү. Ард түмэн буруу, зөвийг ялгадаг болсон гэж харж байна гэв.