УИХ-ын чуулганы пүрэв гарагийн нэгдсэн хуралдаанаар МҮОНРТ-ийн Үндэсний зөвлөлийн гишүүнийг томилох, чөлөөлөх тухай асуудлыг хэлэлцлээ. Нэр дэвшигчдийн талаар байнгын хорооны санал, дүгнэлтийг УИХ-ын гишүүн С.Зулпхар танилцуулав. 

МҮОНРТ-ийн Үндэсний зөвлөлийн гишүүнд нэр дэвшигч:

• Монгол Улсын Ерөнхийлөгчөөс нэр дэвшүүлсэн Д.Гүн-Үйлс,
• УИХ-аас боловсролын чиглэлээр нэр дэвшүүлсэн Д.Мягмарсүрэн, М.Төрманлай,
• Биеийн тамир, спортын чиглэлээр нэр дэвшүүлсэн С.Од-Эрдэнэ нарыг байнгын хорооны хуралдаанд оролцсон гишүүдийн олонх дэмжсэн.

Харин Засгийн газраас нэр дэвшүүлсэн Ч.Батцэнгэл Үндэсний зөвлөлийн гишүүний албан тушаалд нэр дэвшүүлэхийг дэмжээгүй байна.

УИХ-ын гишүүд нэр дэвшигчдээс асуулт, асууж хариулт авсны дараа нууц санал хураалт явуулахад, Д.Гүн-Үйлс, Д Мягмарсүрэн, С.Од-Эрдэнэ, М.Төрманлай нарыг дэмжив. 

Байнгын хорооны хурлаар хуралдаанд оролцсон гишүүдийн 34.4 хувийн санал авч дэмжигдээгүй Ч.Батцэнгэлийг УИХ-ын чуулганы нэгдсэн хуралдаанд оролцсон 104 гишүүний 12 нь дэмжиж, 11.2 хувийн саналаар МҮОНРТ-ийн Үндэсний зөвлөлийн гишүүнээр томилохыг дэмжсэнгүй. 

Ч.Батцэнгэл нь 1997 онд МУБИС-ийг сэтгүүлч, 2016 онд Их засаг олон улсын их сургуулийг төгссөн сэтгүүл зүйн магистр зэрэгтэй. Тэрбээр МҮОНТ-ийн Үдшийн хэмнэл студийн редактор, захирал, МҮОНТ-ийн Програмын хэлтсийн дарга, МҮОНРТ-ийн дэд захирлаар ажиллаж байжээ. 

Үндэсний зөвлөлийн гишүүнд нэр дэвшигчид дэмжигдсэнтэй холбогдуулан Олон нийтийн радио, телевизийн үндэсний зөвлөлийн гишүүний бүрэн эрхийн хугацаа нь дууссан Д.Өлзийбаатар, С.Алтанцэцэг, В.Бат-Эрдэнэ, Д.Батсүх, Н.Жанцан нарыг үүрэгт ажлаас нь чөлөөллөө.