Газрын тосны тухай хуульд өөрчлөлт оруулах тухай  хуулийн төслийн эхний хэлэлцүүлэг өнгөрсөн долоо хоногт болсон. 

Засгийн газраас энэ төслийг өргөн барьж, яаралтай горимоор хэлэлцүүлж байна. УИХ-ын чуулганы нэгдсэн хуралдаанд Эдийн засгийн хөгжлийн сайд Ж.Энхбаяр төслийг танилцуулж, гишүүдийн асуултад хариулав. 
 
Хуулийн төсөл, боловсруулах болсон үндэслэл, шаардлага, хууль зүйн үндэслэл: Засгийн газрын 2024-2028 оны үйл ажиллагааны хөтөлбөрт бодлогын үндсэн дөрвөн чиглэлийн хүрээнд хэрэгжүүлэх 14 мега төслийн 12-т “Газрын тос боловсруулах цогцолборыг ашиглалтад оруулна гэжээ. 

Тус төслийг хэрэгжүүлснээр жилд 1.5 сая тонн түүхий тосноос 1.3 сая тонн бүтээгдэхүүн гарган авч, дотоодын газрын тосны хэрэглээний 55 орчим хувийг бүрэн хангах, импортын хараат байдлыг бууруулах, шатахууны үнийг бие даан, уян хатан зохицуулах боломж бүрдэнэ.” Гэжээ. 

Одоо УИХ энэ төслийг хэлэлцэж байна. 

Эдийн засгийн хөгжлийн сайд Ж.Энхбаяр: Манай улс газрын тосны салбараас нийт 3 их наяд төгрөгийн орлого олсон. 1990 онд Засгийн газар АНУ, Австралийн компаниудтай Бүтээгдэхүүн хуваах гэрээ байгуулж, өнөөг хүртэл мөрдөж байна. Тухайн үеийн Засгийн газар их сайн гэрээ байгуулжээ. Удалгүй 1993-195 онд барууны хөрөнгө оруулагчид БНХАУ-ын хоёр компанид хувьцаагаа зараад явцгаасан. Одоо БНХАУ-ын хөрөнгө оруулалттай “Петрочайна Дачин Тамсаг”, “Доншен газрын тос (Монгол)” ХХК Бүтээгдэхүүн хуваах гэрээний дагуу ажилладаг. Эдгээр компанийн олборлосон нийт газрын тосны 28 хувийг Засгийн газар авдаг. Эдгээр гэрээний хугацаа дуусах дөхөж байна. Иймд газрын тосны эрэл хайгуулын гацааг арилгах зорилгоор хуулийн төсөл өргөн барьсан.              

Ингээд нууц санал хураалт явуулахад хуралдаанд оролцсон гишүүдийн олонх дэмжиж, төслийг эцсийн хэлэлцүүлэгт бэлдүүлэхээр Эдийн засгийн байнгын хороонд шилжүүлэв.