УИХ-ын чуулганы хуралдаан 14.00 цагт эхэлсэн. Нийгмийн даатгалын багц хуулийн төслийг хэлэлцэх цаг болоход УИХ дахь АН-ын бүлэг хоёр цагийн завсарлага хүслээ. Учир нь Засгийн газар, УИХ-ын гишүүн А.Ариунзаяа нарын болон УИХ-ын гишүүн Б.Түвшин нарын өргөн барьсан төслүүдийг нэгтгэсэн. 

Гурван өөр хуулийн төслийг нэгтгэх ажлын хэсгийг УИХ-ын гишүүн Х.Булгантуяа ахалжээ. Ажлын хэсгийн гишүүд дахин ярилцах шаардлагатай гэж үзсэн тул АН-ын бүлэг завсарлага авав.  Хугацаа дууссан тул хуулийн төслийг хэлэлцэж эхлэв.       

Ямар шалтгаанаар ажлаас гарснаас хамаарч, ажилгүйдлийн тэтгэмжийг 2 өөрөөр тогтоодог байна. Хэрэв ажил олгогчийн саналаар ажлаас гарвал 76 хоногийн, ажилтан өөрийн санаачилгаар ажлаас гарвал 55 хоногийн тэтгэмж авдаг. Энэ нь зөв үү? Ижил хэмжээтэй шимтгэл төлсөн байвал яах вэ?  гэж УИХ-ын гишүүн М.Энхтүвшин  асуув.    

Нийгмийн даатгалын газрын дарга Батжаргал: Өмнө нь 40 хоног байсныг 55 хоног болгосон. Ажилтан өөрийн хүсэлтээр ажлаас гарсан гэдэг нь ажилтан эрсдэлийг өөрөө үүсгэсэн гэсэн үг юм. Олон улсын жишгээр ялгаатай тэтгэмж өгдөг.    

УИХ-ын гишүүн Х.Булгантуяа: Манай нийгмийн даатгалын тогтолцоо яг л малгайтай цамцны халаас шиг. Нэг талаас орлого оронгуутаа шууд буцаад тэтгэвэрт зарцуулагддаг. Иргэдийн төлсөн 1 хувь дээр нэмээд Засгийн газар 0.5 хувийн урамшууллыг иргэдэд олгоно. Нийгмийн даатгалын шимтгэл иргэдээ 0.5 хувиар урамшуулна гэсэн үг юм. Ингээд ирэх онд 210 тэрбум  төгрөг хуримтлагдана. Энэ эх үүсвэрийг мэргэжлийн, хөрөнгө оруулалтын сан өсгөх боломжтой. 

Мөнгөжүүлсэн орлогыг ахмад настан бүрэн авч чадалгүй нас барвал үр хүүхдэд нь 100 хувь өвлүүлнэ.  Одоо 27 мянган ахмад настан ажил хийж байна. Тэд өндөр насны тэтгэврээ тогтоолгосноос хойш ажил хийвэл НДШ төлөхгүй байж болно.     

2008 онд нийгмийн даатгалын шимтгэлийг бууруулсан. 2012 онд нөхөн тооцуулах хуулийг баталсан. Үүний нөлөөгөөр 6 их наяд төгрөгийн зардал гарчээ. Иймд энэ хуулийг улс төрийн нөлөөгөөр баталж болохгүй. Нийгмийн даатгалын сан нь халамж биш, бусдыг халамжлах гэж иргэд НДШ төлдөггүй. Уг нь зөрүүг улсын төсвөөс гаргах ёстой ч өгөөгүй. НДС-гаас буюу шударгаар шимтгэлээ төлсөн иргэдээр төлүүлсэн. Цаашид суурь тэтгэврийг улсын төсвөөс тавьдаг болно.

Энэ хуулийг баталснаар улсын төсөвт 1 их наяд төгрөгийн нөлөө үзүүлнэ гэж Гэр бүл, хөдөлмөр, нийгмийн хамгааллын яам хариулав.  

УИХ-ын гишүүн Ж.Баярмаа: Манай улсад дундаж наслалт өссөөр байна. Насжилтын дарамт НДС-д хамгийн түрүүнд ирдэг. Гэтэл  энэ хуульд настай холбоотой ямар ч заалт алга. Тэгэхээр энэ хууль шинэчлэл болж чадах уу? Дэлхийн банк, OECD гэх мэт олон улсын байгууллагууд тэтгэврийн насыг өсгөх зөвлөгөө өгдөг.   

Хуралдаанд 107 гишүүн оролцож байна. Хуулийн төслийг Нийгмийн бодлогын байнгын хороо руу эцсийн хэлэлцүүлэгт бэлтгүүлэхээр шилжүүлэв. УИХ-ын чуулганы нэгдсэн хуралдаан өндөрлөв. Чуулган маргааш 14.00 цагт хуралдана.