Засгийн газрын өнөөдрийн хуралдаанаар хэлэлцэж шийдвэрлэсэн асуудлуудын талаар салбарын сайд нар мэдээлэл хийж байна. 

Аж үйлдвэр, эрдэс баялгийн сайд Г.Дамдинням:

-Гангийн цогцолбор үйлдвэр барих ажлын урьдчилсан сонгон шалгаруулалт дууссан. Аж үйлдвэр, эрдэс баялгийн яамнаас энэ талаар Засгийн газрын хуралдаан танилцуулга хийлээ. Нэг сарын хугацаатай олон улсын нээлттэй тендер зарлаж Монголын бүх дипломат төлөөлөгчдийн газар болон дэлхийн хэмжээнд сонгон шалгаруулалт зарладаг олон улсын хэвлэлээр мэдээлэл түгээсэн. Улмаар сонирхогч таван аж ахуйн нэгжийн санал хүлээн авлаа. Эдгээрээс шаардлага хангасан хоёр аж ахуйн нэгж шалгарч үлдсэн бөгөөд хураангуй жагсаалтад багтсан гэдгийг зарлаж, урилга хүргүүлэхээр шийдвэрлэлээ.

Өөрөөр хэлбэл, аж ахуйн нэгжүүдэд дэлгэрэнгүй мэдээллээ явуулах санал хүргүүлэх юм. Ингээд шалгарсан нэг оролцогчтой хөрөнгө оруулалтын гэрээ хийх ажлыг ярилцан эцэслээд Засгийн газрын хуралд танилцуулна. Улмаар УИХ-д танилцуулах чиглэл авлаа. Энэ гангын үйлдвэр Монгол Улсад үнэтэй хувь нэмэр оруулна. Бид байгалийн баялгаа олборлоод түүхийгээр нь гадаадад экспортолдог биш өөрсдөө дотооддоо боловсруулдаг болох юм.

Зэс хайлуулах үйлдвэрийн сонгон шалгаруулалт дуусаж, ялагч тодорсон, Засгийн газар хэлэлцээр хийж байна.