Ажил зуучлах байгууллагаар дамжуулан барилгын хог цэвэрлэхээр очсон 15 настай хүү барилгын хана нурааж байх үедээ амь эрсэдсэн хэрэг гарсан. Талийгаач хүүгийн ар гэрээс болон өмгөөлөгч нь уг асуудлаар мэдээлэл хийж, насанд хүрээгүй хүүхдийг хүнд хөдөлмөрт зуучилсан компани болон хөдөлмөрийн аюулгүй байдал хангаагүй ажил олгогчид хариуцлага тооцуулахаар Монгол Улсын Ерөнхий сайдын зөвлөхөд шаардлага хүргүүлж буйгаа илэрхийллээ.

Зуучлалын байгууллагаар дамжуулж арилгын ажилд орсон  15 настай хүү хана нурааж байгаад даруулан амиа алдсан хэрэг өнгөрөгч тавдугаар сарын 18-нд гарсан. 

Талийгаач хүүгийн эгч хэлэхдээ "Дүүг маань хөдөлмөр зуучлалын компани барилгын хог хаягдал цэвэрлүүлнэ хэмээн ажилд зуучилсан. Гэтэл тэр хүнд даацын хана нураах ажил хийж байхдаа даруулж тархиндаа гэмтэл авч газар дээрээ амиа алдсан. 

Талийгаачийн ээж хэвтрийн, бие муутай хүн байдаг ба ээжийнхээ эмийг авахын тулд хоёр жилийн өмнө сургуулиасаа завсардаж ажил хийж эхэлсэн юм.  Гэтэл тухайн зуучлалын компани насанд хүрээгүй хүүхдийг хүнд хөдөлмөрт явуулсан. Тухайн үед дүүд маань хөдөлмөрийн аюулгүй байдлын ямар нэгэн зааварчилгаа өгөөгүй юм билээ. Зуучлагч болон ажиллуулсан компаниуд уг хэрэгт бие биеэ буруутгасан нөхцөл байдалтай байна" гэлээ. 

Харин өмгөөлөгчийн хэлж буйгаар уг хэрэгт Баянгол дүүргийн Цагдаагийн нэгдүгээр хэлтэст хэрэг бүртгэлт нээж, мөрдөн шалгах ажиллагаа явуулж байгаа ч маш удаашралтай, цааргалсан шинжтэй байна гэж хохирогчийн ар гэрийнхэн үзэж байна гэлээ. Монгол Улсын хууль тогтоомжоор 13-15 насны хүүхдээр барилгын хана нураах зэрэг аюултай, хүнд хөдөлмөр эрхлүүлэхийг хатуу хориглосон байдаг. Хууль зөрчиж, насанд хүрээгүй хүүхдүүдийг хууль бусаар ажиллуулж, амь насыг нь хохироож буй эдгээр байгууллагуудын үйл ажиллагааг таслан зогсоох, хатуу хариуцлага тооцохыг шаардаж Ерөнхий сайдын зөвлөхөд хандаж байгаа гэлээ.  Мөн салбарын сайдад нь энэ хэргийн талаар шаардлага хүргүүлнэ. Салбарын сайд, яамны баталсан журам байдаг ч үүнийг дагаж мөрдөхгүй байна гэв.