УИХ-ын Хууль зүйн байнгын хорооны хуралдаанд Хүний эрхийн дэд хорооноос хүүхэд хамгааллын чиглэлээр орон нутагт хийсэн хэлэлцүүлгийн талаарх мэдээллийг танилцууллаа. 

Уг асуудалтай холбоотойгоор УИХ-ын гишүүн П.Сайнзориг үг хэлэв. Тэрбээр "Танилцуулга дээр хүүхдийн хэлсэн үг орсон байсан. "Та нар энэ саналуудыг бичиж аваад, тэр чигтээ битгий яваарай" гэсэн. Өөрөөр хэлбэл энэ асуудлыг бодит ажил болгоорой, битгий дүр үзүүлээрэй, хэлбэртэхээ болиорой ах, эгч нараа гэж хэлээд байгаа юм. 

Бид хүүхдийн асуудал дээр мөн ч их хэлбэртэж, дүр эсгэлээ. Бодитой, тодорхой шийдвэрүүд гаргадаг байя. 

ХЭҮК-оос харамсалтай мэдээлэл өгч байна. 2024 онд 14-оос доош насны 144 хүүхэд жирэмсэлсэн байна. Цаанаа хайр сэтгэл байсан ч насны зөвшөөрөл буюу бэлгийн харьцаанд орох нас болоогүй тул хүчингийн гэмт хэрэг явж байна. 

Бид нар хүүхдүүдэд хэр хайртай, хэр анхаарал хандуулж байгаа нь л эндээс харагдана. Энэ бол төрийн үйл ажиллагаатай холбон шууд буруу гэхээс илүү эцэг эхчүүдийн оролцоо ч бас чухал гэдгийг илтгэх үзүүлэлт гэж бодож байна. 

Хүүхдийн төлөө үйл ажиллагаануудад төрөөс бодлогын дэмжлэг үзүүлэх ёстой. Энэ бодлогын дэмжлэгүүдийг үргэлж улс төржүүлдэг. 

Хоёр жилийн өмнө хүүхдийн соёлын ваучер зарлах гэтэл бүгдийг нь улс төржүүлсээр байгаад хассан. Хүүхдүүд энийг л нэхсэн байна шүү дээ. Цагаа өнгөрүүлэх газар алга, суралцаж хөгжмөөр байна, амьдралын янз бүрийн бололцоотой хүүхдүүд байна гэдгийг өөрсдөө бодитоор хэлсэн байна. 

Төсөв хэмнэх гэж байсан уу, эсвэл тухайн үеийн сайд Ч.Номин таалагдаагүй юм уу? Хүүхдийн төлөө бодлогыг нулимж, улс төр хийж байсан хүмүүс одоо гэгээн цагаан л хүмүүс болчихсон явж байна" гэв.