ОХУ-ын ерөнхийлөгч Владимир Путин Украины дайнд дайтахаар гэрээ байгуулж буй цэргүүд болон тэдний гэр бүлийн гишүүдийг өр төлбөрөөс нь чөлөөлөх захирамжид гарын үсэг зуржээ. 

Тодруулбал энэ оны тавдугаар сарын 1-нээс хойш Батлан хамгаалахын яамтай гэрээ байгуулсан цэргүүд болон/эсвэл тэдний гэр бүлийн гишүүнийг 10 сая рубль хүртэлх өр төлбөрөөс нь чөлөөлөх юм байна. 

Гэхдээ тухайн өрийг барагдуулах тухай шүүхийн шийдвэр уг өдрөөс өмнө хүчин төгөлдөр болсон байх ёстой гэв.

10 сая рубль гэдэг нь Москва хотод 35 м.кв орчим байр худалдан авах дүнтэй дүйж байгааг Cian үл хөдлөх хөрөнгийн газраас тооцоолжээ.

Дайнд оролцох гэрээг цэргүүд дор хаяж нэг жилийн хугацаатайгаар байгуулах шаардлагатай гэдгийг Кремлиэс онцолсон байна. 

Энэ шийдвэр ОХУ армийн хүчээ зузаатгахаар оролдож буй энэ үед фронтод тулалдаж буй цэргүүдэд олгож буй төрөл бүрийн дэмжлэгийн нэг хэсэг болж байна. 

Цэргүүдэд олгож буй дэмжлэгт их хэмжээний мөнгөн урамшуулал, их дээд сургуульд давуу эрхтэйгээр элсүүлэх зэрэг боломж багтдаг.

Эх сурвалж: Reuters