Боловсролын сайд Л.Энх-Амгалан Өндөр гэгээн Занабазарын нэрэмжит Бурхан шашны их сургуулийн дэргэдэх төрөлжсөн ерөнхий боловсролын 112 дугаар сургуулийн үйл ажиллагаатай танилцжээ. 

Тэрбээр өмнө нь сайд байхдаа тус сургуулийн шинэ барилга барих шийдвэрийг гаргаж, Нийслэлийн Засаг даргатай хамтран санхүүжилтийг шийдвэрлэснээр зориулалтын маш сайхан сургуультай болсон байна.

2022 онд Гэсэр сүмийн хашаанд хуучин сүмийн зориулалтаар барьсан шавар байшинтай, тогтсон хөтөлбөргүй, сургалтын хэрэглэгдэхүүн гэх зүйл бараг байхгүй, хүүхдүүдийн бүртгэл мэдээлэлгүй байсан аж.

Сургуулийн барилга байгууламжаас гадна шашин болон ерөнхий эрдмийн хичээл хоорондын уялдаатай хөтөлбөрийн шинэчлэл хийж, дотоодын болон Энэтхэгийн хийдүүдэд шавилан сууж буй лам нарт цахимаар болон боловсрол нөхөн олгох хөтөлбөрөөр боловсрол эзэмших боломж бүрдүүлж байна.

Сайд Л.Энх-Амгалан, 11-р сургуулийг цаашид ерөнхий боловсролын болон цахим сургалт зохион байгуулах техник, тоног төхөөрөмжөөр хангах, багшийн нөөцийг чадавхжуулахад анхаарч ажиллана. Энэ дагуу цахим, ухаалаг хичээлийн тэнхимийг бүрэн тохижуулна.

Монгол Улсад болон гадаад улс оронд буддын дацан хийдэд суралцаж буй лам хүүхдүүдэд суурь боловсролыг заавал эзэмшүүлэхийн зэрэгцээ, монгол хэл, соёлын сургалтад хамруулах ажлыг энэ сургуулиар дамжуулан хэрэгжүүлнэ. 

Ингэхдээ сургалтын нэгдсэн хөтөлбөрийн хүрээнд шашны сургуульд суралцах хутагт, хувилгаадад зориулсан тусгай хөтөлбөртэй болох, монгол хүүхдийн онцлогт тохирсон шашин, ерөнхий мэдлэгийг хослуулсан цогц хөтөлбөрийг батлуулах зэрэг онцлогт нь тохирсон бодлого гаргана. Мөн бурхны шашны сургуулийн нэршлийг тодорхой болгох үүрэг, чиглэл өглөө.