УИХ-ын чуулганы хуралдаан эхэллээ. Чуулганы өнөөдрийн хуралдаанаар дараах асуудлыг хэлэлцэнэ. Үүнд:

• Монгол Улсын нэгдсэн төсвийн 2027 оны төсвийн хүрээний мэдэгдэл, 2028-2029 оны төсвийн төсөөллийн тухай хуулийн төсөлтэй хамт өргөн мэдүүлсэн хуулийн төслүүд /Засгийн газар 2026.05.01-ний өдөр өргөн мэдүүлсэн, хэлэлцэх эсэх, асуулт асуух хугацаа 120 минут/
• Олон хүүхэд төрүүлж өсгөсөн эхийг урамшуулах тухай хуульд өөрчлөлт оруулах тухай хуулийн төсөл /УИХ-ын гишүүн Д.Үүрийнтуяа нарын 6 гишүүн 2025.06.24-ний өдөр өргөн мэдүүлсэн, анхны хэлэлцүүлэг, асуулт асуух хугацаа 90 минут/
• БНМАУ-ын Засгийн газарт эрх олгох тухай хууль хүчингүй болсонд тооцох тухай хуулийн төсөл /УИХ-ын гишүүн С.Цэнгүүн 2025.12.30-ны өдөр өргөн мэдүүлсэн, анхны хэлэлцүүлэг, асуулт асуух хугацаа 90 минут/
• Эрүүгийн хуульд өөрчлөлт оруулах тухай хуулийн төсөл /Монгол Улсын Үндсэн хуулийн цэцийн 2025 оны 10 дугаар дүгнэлтийг хүлээн зөвшөөрсөнтэй холбогдуулан боловсруулсан, анхны хэлэлцүүлэг, асуулт асуух хугацаа 90 минут/
• Цусны донорын тухай хуулийн төсөл /УИХ-ын гишүүн Ж.Чинбүрэн нарын 4 гишүүн  2025.03.31-ний өдөр өргөн мэдүүлсэн, эцсийн  хэлэлцүүлэг, асуулт асуух хугацаа 60 минут/
• Байгаль орчинд нөлөөлөх байдлын үнэлгээний тухай хуульд нэмэлт, өөрчлөлт оруулах тухай хуулийн төсөл /Засгийн газар  2025.05.16-ны өдөр өргөн мэдүүлсэн, эцсийн хэлэлцүүлэг, асуулт асуух хугацаа 60 минут/
• Дэд хорооны бүрэлдэхүүнд өөрчлөлт оруулах тухай асуудал
• Улсын дээд шүүхийн шүүгчид нэр дэвшигчтэй  танилцах тухай
• “Улсын төсвийн хөрөнгө оруулалтаар төсөл, арга хэмжээг санхүүжүүлэх талаар авч хэрэгжүүлэх зарим арга хэмжээний тухай”  Улсын Их Хурлын тогтоолын төсөл           /УИХ-ын гишүүн Б.Пунсалмаа нарын 13 гишүүн 2026.05.07-ны өдөр өргөн мэдүүлсэн, хэлэлцэх эсэх, асуулт асуух хугацаа 90  минут/
• ““Төрөөс төмөр замын талаар баримтлах бодлого”-ын хэрэгжилтийг хангах зарим арга хэмжээний тухай” Улсын Их Хурлын тогтоолын төсөл /УИХ-ын гишүүн Б.Пүрэвдорж нарын 42 гишүүн 2025.06.19-ний өдөр өргөн мэдүүлсэн, хэлэлцэх эсэх, асуулт асуух хугацаа 90  минут/
• Бусад

Монгол Улсын нэгдсэн төсвийн 2027 оны төсвийн хүрээний мэдэгдэл, 2028-2029 оны төсвийн төсөөллийн тухай хуулийн төсөлтэй хамт өргөн мэдүүлсэн хуулийн төслүүд-ийг хэлэлцэх эсэх хэлэлцүүлэг эхэллээ. 

Эдийн засаг, хөгжлийн сайд Ж.Энхбаяр Засгийн газраас Монгол Улсын нэгдсэн төсвийн 2027 оны төсвийн хүрээний мэдэгдэл, 2028-2029 оны төсвийн төсөөллийн тухай хуулийн төсөлтэй хамт өргөн мэдүүлсэн хуулийн төслүүд болох НӨАТ-ын тухай хуульд өөрчлөлт оруулах тухай, Төсвийн тогтвортой байдлын тухай хуульд өөрчлөлт оруулах тухай хуулийн төслүүдийг танилцуулав.

Эдийн засаг, хөгжлийн сайд Ж.Энхбаяр:

-НӨАТ-ын буцаан олголтыг өнөөдөр хүчин төгөлдөр мөрдөж буй хоёр нэгж хувь байх зохицуулалтыг хэвээр хадгалахаар энэхүү хуулийн төслийг боловсрууллаа.

Өнгөрсөн жил баталсан нэмүү өртгийн албан татварын буцаалтыг нэмэгдүүлэх зохицуулалт хэрэгжиж эхлэх үед төсвийн орлого 1.8-2.5 их наяд төгрөгөөр буурахаар байна. Мөн 2025 оны намар төсөв батлах үед багш, эмч нарын цалинг өндөр дүнгээр нэмсний улмаас төсвийн урсгал зардлын хэрэгцээ өндөр байгаа энэ үед төсвийн орлого огцом буурахаар байгаа нь төсвийн тогтвортой байдлыг хангахад хүндрэлтэй болж байна.

Эдгээрийг харгалзан Засгийн газраас дээрх хуулийн төслүүдийг боловсруулсан. Ингэхдээ эдийн засгийн бодит нөхцөл байдал, иргэдийн амьжиргаанд үзүүлэх нөлөөллийг цогцоор харгалзан үзсэн болно. Иймд Монгол Улсын нэгдсэн төсвийн 2027 оны төсвийн хүрээний мэдэгдэл, 2028-2029 оны төсвийн төсөөллийн тухай хуулийн төсөлтэй хамт өргөн мэдүүлсэн хуулийн төслүүдийг хэлэлцэн шийдвэрлэж өгөхийг хүсье.

Хэлэлцэж байгаа асуудалтай холбогдуулан УИХ-ын гишүүн Б.Уянга “Байнга хэлбэлзэж байдаг төсвийн хүрээний мэдэгдлийг батлах шаардлага байна уу. Улс орнууд үүнийгээ яаж тогтвортой байлгадаг юм бэ” гэж асуув.  

Үүнд Эдийн засаг, хөгжлийн сайд Ж.Энхбаяр “Дэлхийн бүх орнууд төсвийн хүрээ буюу макро эдийн засгийн төлөвөө тооцоолоод төсвөөсөө өмнө парламентаараа батлуулдаг. Төсвийн хүрээгүй явж яагаад ч болохгүй. Үүн дотроо Сангийн яам төсвөө зохиож явах ёстой” гэж хариуллаа.