"Компаниуд хөдөөгүүр явж, "үнээр цохиж" малчдаас мах авч байна. Бид хөдөөгүүр явж малчдаас мах авч байгаа ч энэ жил мах маш ховор байна. "Та нар хямдаар авч байна" гэж малчид бидэнд мах зарах дургүй байна" гэж Хан-Уул дүүргийн I хороонд байрлах махны дэлгүүрийн худалдаачин ярив.  

ХХААХҮ-ийн сайд Ц.Идэрбатаас сэтгүүлчид өнөөдөр /2026.05.13/ махны үнийн өсөлтийн талаар тодрууллаа.

Тэрбээр, Төв суурин газрын махны хангамжийг тухайн орон нутгийн удирдлагууд хариуцдаг. Улаанбаатар хотын хувьд долоо хоногийн өмнөх мэдээллээр нийслэлд 1600 тонн нөөцийн махыг түгээлт хийж байна. үүний 600 орчим тонн нь хонины, 1100 орчим нь үхрийн мах гэсэн мэдээлэл өгсөн.

-Махны үнэ огцом өссөн нь экспортыг нэмэгдүүлсэнтэй холбоотой гэж махны худалдаачид болон олон нийт үзэж байна. Танд энэ талаар ямар мэдээлэл байна вэ?
-2026 оны 5-р сарын 11-ний байдлаар 2100 тонн мах экспортолсон байна. Үүний 870 тонн нь адууны, 1100 тонн өнгөрсөн намар дулааны аргаар боловсруулж бэлдсэн үхрийн мах байна. Узбекистан улс руу 40 тонн хонины мах экспортолсон гэх мэдээллийг ГЕГ-аас өгсөн. Тэгэхээр махны үнийн өсөлтөд экспорт нөлөөлж байна гэж дүгнэхэд хэцүү.

Хаврын махны үнийн өсөлт жил бүр улаанбаатарчууд, төв суурин газрынхны гол асуудал болж, энэ нь инфляцид хүчтэй нөлөөлдөг болоод байна. Тиймээс нийслэл, аймаг, суурин газрын удирдлагууд иргэдийнхээ махны хэрэглээг хангах чиглэлд дэвшил гаргаж ажиллах ёстой.

Нийслэлийн хувьд энэ жил 5000 тонн мах нөөцөлсөн бол ирэх жил үүнээс ахиулж бэлдэх яриаг одооноос хийж байна гэлээ.