Хантавирусийн халдвар дэгдсэн аяллын хөлөг онгоцоор зорчоод эх орондоо буцсан франц эмэгтэй уг вирусээр өвчилсөн нь батлагдсан. 

Түүний биеийн байдал муудаж, амьсгалын аппаратаар эмчилж байгааг Парис хотын эмнэлгээс мэдэгдсэн байна. 

Одоогоор уг дэгдэлттэй холбоотой нийт 11 тохиолдол батлагдаад буй. 

Хөлөг онгоцны аялалд хамрагдсан гурван хүн уг вирусийн улмаас нас барсан бөгөөд тэдний дунд анх халдвар авсан гэж үзэж буй нидерланд хос байсан юм.

Бүх зорчигч болон хөлгийн багийн гишүүдийг буулгасны дараа MV Hondius хөлөг Нидерланд руу буцаж байгаа бөгөөд тэнд бүрэн цэвэрлэгээ, халдваргүйжүүлэлт хийхээр төлөвлөжээ.

Вирусийн нууц үе нь урт байдаг тул ойрын хэдэн долоо хоногт нэмж тохиолдлууд илэрч болзошгүй.

Дэлхийн эрүүл мэндийн байгууллагын тэргүүн батлагдсан болон сэжигтэй тохиолдлууд тус хөлгөөр зорчсон хүмүүсийн дунд л гарсан гэдгийг мэдэгдсэн. 

Тэрбээр “Одоогоор энэ нь томоохон дэгдэлтийн эхлэл болно гэсэн шинж тэмдэг байхгүй” гэдгийг мөн онцолсон юм. 

Гэхдээ вирусийн нууц үе нь урт байдаг тул ойрын хэдэн долоо хоногт нэмж тохиолдлууд илэрч болзошгүйг анхааруулжээ. 

Хамгийн сүүлд Испанийн нэг зорчигчоос хантавирус илэрсэн бөгөөд түүнийг хөлгөөс нүүлгэн шилжүүлсний дараа Мадрид дахь цэргийн эмнэлэгт тусгаарлаж байгаа талаар Испанийн Эрүүл мэндийн яам мэдээлсэн.

Одоогоор хантавирусийн эсрэг тусгай эмчилгээ, вакцин байхгүй ч эрт илрүүлж эмчлэх нь амьд үлдэх боломжийг нэмэгдүүлдэг гэж ДЭМБ мэдэгдсэн байна.

Аргентины Эрүүл мэндийн яам ойрын өдрүүдэд дэгдэлтийн эх үүсвэрийг тогтоохоор эрдэмтдийн баг илгээнэ гэж мэдэгджээ.

ДЭМБ-ын мэдээлснээр анх халдвар авсан гэж үзэж буй Нидерландын хос аяллын хөлөгт суухаасаа өмнө Аргентин болон Өмнөд Америкийн бусад орнуудаар хэдэн сарын турш аялсан аж.

Тэд шувуу ажиглах аялалд оролцох үеэрээ хогийн цэг дээр очсон бөгөөд тэнд халдвар тээгч мэрэгч амьтанд хүрсэн байж болзошгүй гэжээ.

Эх сурвалж: АР