АНУ-ын ерөнхийлөгч Дональд Трамп Бээжинд 2017 оноос хойших анхны айлчлалаа хийх гэж байна. 

Энэ хүрээнд тэрбээр мэдээлэл өгөхдөө "БНХАУ-ын дарга Ши Жиньпинтэй Ираны асуудлаар яриа хэлэлцээ хийх ч Ши Жиньпиний тусламжийг авах шаардлагагүй" гэв. 

Тэрбээр БНХАУ руу нисэхийнхээ өмнө "Ираны асуудал дээр бидэнд тусламж хэрэггүй гэж бодож байна. Бид ямар ч тохиолдолд ялна. Энхийн замаар ч бай, өөр аргаар ч бай” хэмээн ярьжээ. 

Дэлхийн хамгийн том эдийн засагтай хоёр гүрний удирдагчид энэ сарын 13-15-ны хооронд Бээжин хотноо уулзаж буй. 

Уг айлчлал АНУ, Ираны мөргөлдөөний үеэр хэрэгжиж буй бөгөөд БНХАУ нь Ирантай холбоотон улс төдийгүй газрын тосных нь гол худалдан авагчдын нэг юм. 

Трамп өмнө нь БНХАУ-ыг нөлөөгөө ашиглан Тегераныг Вашингтонтой хэлэлцээ хийх, мөргөлдөөнийг дуусгахад шахалт үзүүлэхийг уриалж байсан.

Талууд энэхүү уулзалтаар Ираны асуудлаас гадна технологийн өрсөлдөөнөөс эхлээд Тайваний асуудлыг ч хэлэлцэх төлөвтэй байна. 

Түүнчлэн Трампын ногдуулсан импортын татвартай холбоотойгоор талуудын хооронд худалдааны дайн үүссэн. 

Энэ асуудлаар хоёр улсын удирдагчид зургаан сарын өмнө БНСУ-д уулзахдаа татвар ногдуулах хугацааг нэг жилээр хойшлуулахаар тохиролцсон юм. 

Энэ удаагийн айлчлалаар худалдааны асуудлаар ямар нэг хэлэлцээ хийж магадгүй гэсэн таамаг бий. 

Эх сурвалж: Reuters