Нийслэлийн удирдах ажилтнуудын ээлжит зөвлөгөөн өнөөдөр боллоо. Уг зөвлөгөөнөөр нийслэлийн Засаг дарга бөгөөд Улаанбаатар хотын Захирагч Х.Нямбаатар зарим томилгооны талаар танилцууллаа. 

Нийслэлийн Засаг даргын Эдийн засаг, дэд бүтцийн асуудал хариуцсан нэгдүгээр орлогч Т.Даваадалай өөрийн хүсэлтээр ажлаасаа чөлөөлөгдсөн. Үүнтэй холбогдуулан нийслэлийн Засаг даргын нэгдүгээр орлогчоор Г.Жаргалсайханыг томиллоо. Нэгдүгээр орлогч нийгмийн салбар, ногоон хөгжил, агаар, орчны бохирдлыг хариуцна. 

Г.Жаргалсайхан нь 2020-2026 онд БЗД-ийн Засаг даргын орлогч, Засаг даргаар ажиллажээ. Харин нийслэлийн Засаг даргын Нийгмийн салбар, ногоон хөгжил болон агаар, орчны бохирдлын асуудал хариуцсан орлогч А.Амартүвшин цаашид Эдийн засгийн хөгжил, дэд бүтцийн асуудлыг хариуцаж ажиллахаар боллоо.

Мөн нийслэлийн Автозамын түгжрэлийг бууруулах төсөл, хөтөлбөрийн зохицуулагчаар Л.Ану-Үжинг томиллоо. Тэрээр “Улаанбаатар трамвай” төслийн удирдагч байсан юм. “Улаанбаатар метро”, “Улаанбаатар трамвай” төслүүдийг Т.Мөнхдалай хариуцан ажиллана гэж НЗДТГ-ЫН Хэвлэл мэдээлэл, олон нийттэй харилцах хэлтэс мэдээлэв.

Г.ЖАРГАЛСАЙХАНЫ ХӨРӨНГӨ ОРЛОГЫН МЭДҮҮЛЭГ 

Жилийн нийт орлого: 2020 онд 48 сая → 2024 онд 109 сая
Гэр бүлийн гишүүдийн нийт орлого: 0
Нийтийн орон сууц: 1
Зуслангийн байшин: 0
Авто гараж:                 0 
Орон сууцны үнэ: 2024 онд 160 сая төгрөг/
Тээврийн хэрэгсэл, төрөл, марк: 2019 онд 16 сая төгрөгийн үнэ бүхий Суудлын жижиг машин,Hyundai, Sonata 7- 1
Мал амьтан: Адуу-32, Үхэр-52. Эдгээр нь 178 сая төгрөг.  
Үнэт эдлэл, урлаг, түүхийн үнэт зүйл: 2024 онд 33 сая
Дотоодын банк, санхүүгийн байгууллага дахь хадгаламж: 5 сая
Авлага: 290 сая
Зээл: 97 сая 
Бэлэг, хандив, өв залгамжлал: 153 сая төгрөг