Ирэх сарын 1-нээс ахмадуудын тэтгэвэр болон тэтгэмжийг нэмэх Засгийн газар шийдвэр гарсан. Энэ талаар ХНХЯ-наас өнөөдөр 13.30 цагт мэдээлнэ.

Мөн төрийн албан хаагчдын цалингийн нэмэгдэл;
-    Нийгмийн даатгалын сангаас олгодог тэтгэврийн нэмэгдэл;
-    Нийгмийн халамжийн тэтгэвэр, тэтгэмж;
-    Хүүхдийн мөнгөний нөхөн олголт, шинээр төрсөн хүүхдээ хүүхдийн мөнгөн тэтгэмжид хамруулах зааврын талаар болон www.ndaatgal.mn-ээр тэтгэврийн өөрчлөлтийн мэдээллээ шалгах зааврыг танилцуулна. Бид та бүхэнд мэдээллийг шууд дамжуулан хүргэх болно.

ХНХЯ-ны Хөдөлмөрийн харилцааны бодлогын хэрэгжилтийг зохицуулах газрын дарга Б.Алимаа төрийн албан хаагчдын цалинг нэмэхэд 991 тэрбум төгрөг зарцуулна гэв. Төрийн нийтлэг үйлчилгээний 52 мянган ажилтан бий. Тэдний цалинг өмнө нь 8 хувиар нэмсэн бол ирэх сарын 1-нээс дахин нэмнэ. Төрийн захиргааны албан хаагчдын цалин хамгийн бага нь 790 мянган төгрөг байсан бол ирэх сараас 1 сая төгрөг болно.

Төрийн тусгай албан хаагчдын цалинг 710 мянган төгрөгөөс 1 сая төгрөг болгоно.     

НДЕГ-ын даргын үүргийг түр орлон гүйцэтгэгч Ц.Ганцэцэг дараах мэдээллийг өглөө: 

-Бид нийт 496 мянган ахмадын тэтгэврийг шинэ итгэлцүүрийн дагуу бодож тогтоолоо. Нэг ажил мэргэжлээр, ижил хугацаанд ажилласан хүмүүсийн тэтгэвэр хэзээ тогтоолгосноос хамаарч өөр өөр байдаг. Тухайн үед буюу тэтгэвэр тогтоолгоход цалин нь ямар байснаас хамаарч өөр өөр тэтгэвэр авдаг байв. Цаашид энэ ялгааг арилгана. Багш тэтгэврээ тогтоолгоход одоо багш нарын цалин ямар хэмжээтэй байгаатай уялдуулдаг болно.