"Катар 2022" ДАШТ-ий E хэсгийн сүүлийн тоглолт өнөөдөр Коста Рика болон Германы шигшээ багийн хооронд боллоо. Тус тоглолтыг эмэгтэй шүүгчдийн баг дэнсэлсэн нь ДАШТ-ий түүхэд анхных юм.

Талбайн шүүгчээр Францын Стефани Фраппарт ажилласан бол захын шүүгчдээр Бразилын Неуза Байк, Мексикийн Карен Диаз нар ажиллав.

Өдгөө 38 настай Стефани Фраппарт нь 2009 оноос хойш ажиллаж байгаа бөгөөд 2020 онд UEFA-ийн Аваргуудын лигийн тоглолтыг шүүсэн анхны эмэгтэй болсон.

Түүнчлэн ДАШТ-ий урьдчилсан шатны тоглолтыг шүүсэн анхны эмэгтэй, Францын 1-р лигийн тоглолтыг шүүсэн анхны эмэгтэй юм.

Энэ удаагийн ДАШТ Арабын оронд, тэр дундаа Катарт болж байгаа нь хүний эрхийн төлөө тэмцэгчдийн дургүйцлийг хүргэсэн. Учир нь тус улсад хүний эрх, ялангуяа эмэгтэйчүүдийн эрх илүү зөрчигддөг гэж үздэг.

Харин ДАШТ-ий том тайзнаа эмэгтэй шүүгчдийг ажиллуулсан нь эмэгтэйчүүдийн эрхийг хүндлэхийг дэлхий дахинд, Арабт уриалсан хэрэг боллоо гэж зарим шинжээчид үзэж байна.