"Катар 2022" ДАШТ-д оролцож буй хамгийн залуу тамирчин бол Германы довтлогч Юссуфа Мукоко юм. 2004 оны арваннэгдүгээр сарын 20-д Камеруны нийслэл Яунде хотод төрсөн тэрээр ДАШТ эхлэхтэй зэрэгцэн 18 нас хүрсэн билээ.

Германы "Borussia Dortmund" клубт тоглодог Мукоко энэ улиралд клубийнхээ төлөө 14 тоглолтод 6 гоол оруулж, 4 гоолын дамжуулалт өгөөд байна.

Германы "FC St. Pauli" багийн хүүхдийн академид тоглож байсан тэрээр 12 насандаа "Borussia Dortmund" клубийн хүүхдийн багт элссэн. Улмаар ердөө 13 насандаа тус клубийн 17 хүртэлх насны багт багтаж тоглосон юм.

Ингээд 2019 онд 15 насандаа клубийн 19 хүртэлх насны багт тоглож эхэлсэн Мукоко 2020 оны зун 16 насандаа үндсэн багийн тоглогч болж мэргэжлийн тоглогчийн гэрээг үзэглэсэн байна.

Германы шигшээ багийн U16, U20, U21 насны шигшээ багт тоглож явсан Мукоко ДАШТ-д тоглосон хамгийн залуу тоглогчдын нэг болох боломжтой.

ДАШТ-ий түүхэд талбайд гарсан хамгийн залуу тоглогч нь Умард Ирландын Норман Уайтсайд. Тэрээр 1982 онд 17 нас 1 сар 10 хоногтой байхдаа Югославын эсрэг тоглож байв.

Германы шигшээ баг хэсгийн эхний тоглолтоо 11-р сарын 23-ны 21:00 цагаас Японтой хийнэ. Дэлгэрэнгүй хуваарь үзэх.