ДАШТ-ий хоёр дахь тоглолт B хэсгийн Англи болон Ираны шигшээ багуудын хооронд болоход Англичууд 6-2 харьцаагаар хожлоо.

Дасгалжуулагч Гарет Саутгейтын удирдсан Англичууд бөмбөг эзэмшин тоглолтыг удирдаж эхэлсэн бөгөөд хамгийн эхний аюултай довтолгоо нь Ираны хаалгачийг гэмтээсэн. Английн Тоттенхэм клубийн Довтлогч Харри Кейн баруун жигүүрээс хөндлөн дамжуулах үед Ираны хаалгач Алиреза Бейранванд өөрийн багийн хамгаалагчтай мөргөлдөж хамар, толгойгоо бэртээв.

Улмаар хамгаалалт сайтай Ираны гарааны хаалгач дамнуурга дээр талбайг орхиж оронд нь сэлгээний хаалгач Сайед Хоссейн Хоссейни орж ирсэн. Улмаар Английн довтолгоо улам ширүүсэж 35 дахь минутад Люк Шогийн дамжуулалтаар Жюд Беллинхэм мөргөн гоолдлоо. Өдгөө 19 настай, Премьер лигээс өөр лигт тоглодог Английн шигшээ багийн цор ганц тоглогч Беллинхэм дэлхийн тайзнаа гялалзаж байна.

Эхний гоол Английн довтолгоог сэргээж нэгдүгээр үе дуусахад Букаяо Сака, Рахим Стерлинг нарын гоолыг нэмж 3-0 харьцаатайгаар дуусгав.

Англичууд хоёрдугаар үед ч өөртөө итгэлтэй, алдаа багатай тоглолтоо үргэлжлүүлж Букаяо Сака 62 дахь минутад гоолдсон. Гэвч үр дүн 4-0 болоход санаа амарсан Английн хамгаалалт задарч Иранчууд анхны гоолоо орууллаа. Гоолын эзэн нь Португалын Порту клубт тоглодог Мехди Тареми байв.

Гоол алдаад удаагүй Англичууд дөрвөн сэлгээг зэрэг хийсэн ба талбайд орж ирсэн Маркус Рашфорд, Жак Грилиш нар гоол оруулав. Иранчууд тоглолтын төгсгөлд олдсон торгуулийн цохилтоо оруулж тооны харьцаа 6-2-оор өндөрлөж Англичууд хэсгээ тэргүүлж эхэллээ.