"Катар 2022" ДАШТ-д оролцож буй хамгийн ахмад тамирчин бол Мексикийн хаалгач Альфредо Талавера юм. 1982 оны есдүгээр сарын 18-д төрсөн, өдгөө 40 настай тэрээр Мексикийн дээд лигийн "FC Juarez" клубт тоглодог.

Хөл бөмбөгийн замналаа Мексикийн "Guadalajara" клубээс эхлүүлсэн тэрээр нутгийнхаа "CD Tapatio", "Chivas", "Tigres UANL", "Toluca", "UNAM Pumas" клубүүдэд тоглож явсан.

Талавера "Toluca" клубт тоглож байхдаа шигшээ багтаа дуудагдаж 2011 онд 40, 2016 онд 3 тоглолтод оролцсон. Харин энэ удаагийн ДАШТ-д талбайд гарвал 44 дэх тоглолтдоо оролцох юм.

"FC Juarez" клуб энэ улирлын эхний тэмцээн буюу "Apertura"-д 17 тоглосноос 4 хожин, 7 тэнцэж, 6 хожигдон 19 оноо цуглуулж 11-р байрт орсон. Талавера 17 тоглолтод гараанд гарсан ба 18 гоол алдаж, 3 удаа хаалгаа хуурай манасан.

Тэрээр Мексикийн "Apertura" болон "Clausura" цомуудыг тус бүр нэг удаа өргөж Хойд Америкийн аварга шалгаруулах "Gold Cup" тэмцээнд нэг удаа түрүүлж байв.

ДАШТ-ий түүхэд талбайд гарсан хамгийн ахмад тоглогч нь Египетийн хаалгач Эссам Эл Хадари юм. Тэрээр 2018 онд 45 нас 5 сар 10 хоногтойдоо Саудын Арабын эсрэг талбайд гарч байв.

Мексикийн шигшээ баг ДАШТ-ий эхний тоглолтоо 11-р сарын 23-ны 00:00 цагаас Польштой хийнэ. Дэлгэрэнгүй хуваарь үзэх