Испанийн Ла лигийн 33-р тойрогт хүснэгтийг тэргүүлэгч Барселона Камп Ноу цэнгэлдэхдээ Валэнсиад 2-1-ээр хожигдсон хэдий ч тус тоглолтод блауграначуудын хайртай довтлогч Лионел Месси өөрийн кареерийн 500 дахь гоолоо оруулсан билээ.

Одоогоос 11 жилийн өмнө, тодруулбал 2005 оны 5 сард 17 настай Месси хүү Барсагийн 1-р багт тоглон анхныхаа гоолыг Албасете багийн эсрэг хийж байжээ. Тэр цагаас хойш оруулсан 500 гоолоо тэр хэрхэн хийснийг Их Британийн BBC агентлаг судалжээ.

Тэрээр нийт оруулсан гоолын 406-г буюу бүх гоолын 81 хувийг зүүн хөлөөрөө,  71-ийг баруун хөлөөрөө, 21-ийг толгойгоороо, 2-ыг биеэрээ оруулжээ.

Мөн Месси гараанд нэрлэгдсэн тоглолтууддаа нийт 411 гоолыг оруулсан байна. 500 гоолныхоо 64-ийг торгуулийн цохилтоор, 25-ыг хаалттай цохилтоос хийсэн үзүүлэлттэй байгаа аж.

Месси Барсагийн өмсгөлтэй нийт 88 өөр багийн хаалганд гоол оруулсан үзүүлэлттэй бөгөөд Ла лигийн хатуу самарнууд болох Атлетико Мадрид, Севилья багуудын эсрэг тус бүр 24 гоолыг оруулсан нь хамгийн өндөр үзүүлэлт.

Мөн Реал Мадридийн хаалганд 21 гоолыг зоосон бөгөөд энэ нь түүнийг Эл Класикогийн түүхэнд хамгийн олон гоол оруулсан тоглогч болгодог юм.

Өдгөө 28 настай тэрээр 500 гоолыг оруулахад нийтдээ 539 тоглолт зарцуулсан бол түүний мөнхийн өрсөлдөгч Португалийн Криштиано Роналдо 632 гоолыг оруулахын тулд 791 тоглолтод оролцсон байдаг. Мессигийн хувьд дунджаар 0,79 тоглолт бүртээ гоолддог бол Роналдогийнх 0,68%.

Месси 2012 онд 91 гоол “үйлдвэрлэн” рекорд тогтоон Гиннесийн номд орсон цагаасаа хойш 2015 оныг дуусталх хугацаанд нийтдээ 321 гоолыг өрсөлдөгч багууддаа бэлэглэжээ.

Дэлхийн 5 удаагийн шилдэг тоглогч тэрээр 539 тоглолтынхоо 98-д нь хос морь хөтөлсөн бол 33-т нь хэт-трик, 5 удаа покер гүйцэтгэсэн аж.

Тэр мөн пэнта-трик буюу нэг тоглолтод 5 гоол оруулсан хосгүй амжилтыг 2012 оны Аваргуудын лигийн хасагдах шатанд Лэвэркузений эсрэг хийн, түүхэнд нэрээ бичүүлж байжээ.

Жил ирэх тусам түүний тогтоосон олон олон рекорд шинэчлэгдсээр байгаа ба аргентин довтлогчийн оруулсан 500 гоолыг задлан авч үзвэл :

• 309 – Испанийн лиг (Бүх цаг үеийн мэргэн бууч)
• 83 - Аваргуудын лиг (Бүх цаг үеийн мэргэн буучийн дэд байр)
• 39 - Испанийн Эзэн хааны цом
• 27 - Аргентиний шигшээ, Нөхөрсөг тоглолт
• 15 - Аргентиний шигшээ, дэлхийн аваргын урьдчилсан шат
• 5 - Аргентиний шигшээ, дэлхийн аварга
• 5 - Клубийн дэлхийн аварга
• 3 - Копа Америка
• 3 - Европын супер цом

Эх сурвалж: www.bbc.com