Ерөнхий сайд Н.Учрал Хотын дарга Х.Нямбаатарыг ажлаас нь чөлөөлөх шийдвэр гаргасан. Хотын дараагийн дарга хэн байх вэ гэдэг сэдэв олны анхаарлыг татаж буй энэ үед Б.Пүрэвдагва гэх нэрийг нийгмийн сүлжээнд бичиж эхэлжээ.

Б.ПҮРЭВДАГВА ГЭЖ ХЭН БЭ?

Цахим хуудсанд байршуулсан нээлттэй мэдээллүүдийг нэгтгэвэл тэрбээр Монгол Ардын намын Нарийн бичгийн дарга, намын дэргэдэх Социал Демократ Монголын Залуучуудын холбооны Ерөнхийлөгчөөр ажилладаг. МАН-ын дэргэдэх Социал демократ Монголын залуучуудын холбооны VII Их хурлаар /2024.10.14/ түүнийг 100 хувийн саналаар ерөнхийлөгчөөр сонгож байжээ. Б.Пүрэвдагва нь тухайн үед Баянзүрх дүүргээс нийслэлийн иргэдийн төлөөлөгчдийн хуралд сонгогдон төлөөлөгчөөр ажиллаж байсан.

Тэрбээр 1990 онд төрсөн, Монгол Улсын Их Сургуулийг улс төр судлаач мэргэжлээр төгсөж, 2017 онд Австрали улсын Ньюкастлын Их Сургууль (Newcastle University)-д Тогтвортой хөгжлийн чиглэлээр магистрын зэрэг хамгаалжээ. МАН-д 18 настайдаа буюу 2008 онд элссэн. 

БОЛОВСРОЛ:

• 1998-2008 онд Нийслэлийн 45 дугаар сургууль,
• 2008-2012 онд МУИС-ийг Улс төр судлал мэргэжил,
• 2015-2017 онд Австралийн Ньюкастлын их сургуульд Тогтвортой хөгжлийн судалгаагаар магистр,
• 2019 онд НҮБ-ын Тогтвортой хөгжлийн хөтөлбөрт хамрагдсан.

ЭРХЭЛСЭН АЖИЛ:

• 2010-2011 онд МАН-ын Бүсийн зохицуулагч,
• 2011-2012 он МАН-ын Ерөнхий нарийн бичгийн даргын туслах,
• 2012-2013 онд УИХ-ын Тамгын газарт Референт,
• 2017-2018 онд МАН-ын Ерөнхий нарийн бичгийн даргын зөвлөх,
• 2018-2020 он МАН-ын Орон нутаг, намын хөгжлийн хэлтсийн дарга, 2020 оноос НИТХ-ын Төлөөлөгч,
• 2020-2021 он НАМЗХ-ны Ерөнхий нарийн бичгийн дарга,
• 2021 оноос МАН-ын Намын байгуулалтын газрын дарга,
• 2024 оноос МАН-ын дэргэдэх Социал демократ Монголын залуучуудын холбооны ерөнхийлөгчөөр ажиллаж байна.

Opendata.mn-д байршуулсан 2023 оны Хөрөнгө орлогын мэдүүлэг:

• Нийт орлого: 81,492,000₮
• Орон сууц, барилга байгууламж нийт дүн: 883,000,000₮
• Тээврийн хэрэгсэл: Жийп болон туулах чадвар өндөр, Nissan, Patrol- 1
• Тээврийн хэрэгсэл нийт дүн: 198,500,000₮
• Мал, аж ахуй: Адуу-62, Сайн үүлдрийн үхэр-46
• Мал, аж ахуй нийт дүн: 118,500,000₮
• Газар нийт дүн: 10,000,000₮
• Үнэт эдлэл, урлаг, түүхийн үнэт зүйл нийт дүн: 86,000,000

Б.Пүрэвдагва 2021 онд Нийгмийн Ардчилал-Монголын Залуучуудын Холбооны Ерөнхий Нарийн Бичгийн Даргаар ажиллаж байхдаа “...Цүнх баригч гэдэг их муухай нэр л дээ. Тэгэхдээ цүнх барьж туршлагаждаг тохиолдол байдаг. Олон шийдвэрүүдийг гаргахад тэр хүмүүсээс суралцах, том том процесст оролцох, мэдлэг мэдээллээ өргөжүүлэх, networking-оо тэлэх гээд олон давуу талууд байдаг.

Бид хийж байгаа төсөл хөтөлбөрүүдээрээ энэ хүмүүс чинь цүнх баригчид биш шүү. Харин залуучуудын хөгжлийн төлөө залуучуудын оролцоог хангах үйл ажиллагааг явуулдаг байгууллага юм байна шүү гэдгийг харуулахыг зорьдог. Мэдээж хүмүүсийн туслахаар ажиллаж дагаж явах нь залуучуудад нээлттэй. Үүнд маш их давуу тал байдаг шүү гэж хэлье” хэмээн хэвлэлд ярьжээ.