Зайлшгүй бус хөрөнгө оруулалтыг танаснаар 47 тэрбум төгрөг хэмнэж, гадаадад гацсан иргэдээ татах боломж бийг Т.Доржханд гишүүний ажлын албанаас өнөөдөр мэдээллээ.

Тодруулбал, эдийн засагч Б.Мөнхсоёл "Барилгын бүтээн байгуулалтын жагсаалтыг эрэмбэлж үзвэл хойшлуулж болох төсөл олон байна. Гэтэл эрүүл мэнд, нийгмийн тулгамдсан асуудал олон байна. Тухайлбал, одоогоор 55 орноос 12727 иргэн нутаг буцах хүсэлт гаргасан байна. Нэг хүнд ногдох өртөг нь дунджаар 3,3 сая юм бол нийт иргэдийг авчрахад 42 тэрбум төгрөг зарцуулна. Үүнийг хаанаас гаргаж болох вэ? Хэнтийд барих гэж буй соёлын төвүүд, музей зэрэг хойшлуулж болох бусад хөрөнгө оруулалтыг нийлүүлбэл 47 тэрбум төгрөг гарч байна. Гадаадад гацсан иргэдээ авчрах боломж байгаа ч зайлшгүй бус хөрөнгө оруулалтыг хэвээр үлдээснээр үүнийг шийдэж чадахгүй байна" гэлээ. 

Наадмын өмнө Т.Доржханд гишүүний асуултад Шадар сайд Я.Содбаатар хариулахдаа, Чех, Тайланд зэрэг улсаас 200 иргэнээ татахад 6 тэрбум 600 сая төгрөг зарцуулсан  гэж мэдээлсэн бөгөөд үүнээс нэг хүнд ногдох өртгийг тоймлон гаргажээ.