- "Катар 2022" ДАШТ-д оролцох шигшээ багуудын бүрэлдэхүүнийг цувралаар танилцуулъя -

АНУ-ын шигшээ баг "Катар 2022" хөл бөмбөгийн ДАШТ-д оролцох шилдэг 26 тоглогчоо зарлалаа. Дасгалжуулагч Грегг Берхальтер ДАШТ дэх АНУ-ын түүхэд хоёрт орох залуу бүрэлдэхүүнийг нэрлэжээ.

Түүний багт ДАШТ оролцож байсан ганц тоглогч байгаа нь ДеАндре Йедлин юм. Харин бусад нь хэсгээсээ гарахаас ч том зорилго тээсэн Кристиан Пулисик, Тайлер Адамс, Жиованни Рейна, Уестон МакКенни тэргүүтэй залуус байна.

Бүрэлдэхүүнд "Manchester City" клубд данстай хаалгач Зак Стеффен болон Рикардо Пепи, Жордан Пефок зэрэг танил нэрс багтаагүй.

Багийн хамгийн ахмад тоглогч нь 35 настай төвийн хамгаалагч Тим Рим бол хамгийн залуу нь 19 настай Жо Скалли, Юнус Муса, Жиованни Рейна нар юм. Багийн дундаж нас 25.1 байна.

Энэ 26 тоглогч ДАШТ-ий B хэсэгт Англи, Иран, Уэльсийн шигшээ багтай тоглоно.