Монгол улс, Монголын жүдо бөхийн холбоо "Улаанбаатар 2023" жүдо бөхийн их дуулга тэмцээнийг эх орондоо хоёр дахь жилдээ амжилттай зохион байгууллаа.

Их дуулга зэрэглэлийн тэмцээн нь Олон Улсын жүдо бөхийн холбооноос зохион байгуулдаг дэлхийн цуврал тэмцээнүүдийн нэг бөгөөд Дэлхийн аварга шалгаруулах тэмцээн, Мастерс болон тивийн аварга шалгаруулах тэмцээний араас орохуйц нэр хүнд, шагналын сантай тэмцээн юм.

Улаанбаатар хотод өмнө нь их дуулгаас зэрэглэл доогуур Гран При ангиллын тэмцээнийг зохиож байсан туршлага бий. Энэхүү туршлагад үндэслэн зэрэглэл ахиулж 2022 онд анх удаа 154 мянган еврогийн /528 сая төгрөг/ шагналын сантай тэмцээнийг зохиосон юм.

Их дуулга ангиллын тэмцээнийг зохион байгуулах нь олон улсын тамирчид, үзэгчдийг дагуулах аялал жуулчлал, эдийн засгийн ач холбогдолтой бөгөөд цаашдаа Мастерс болон тив, дэлхийн аварга шалгаруулах тэмцээнийг зохион байгуулахад дөхөм болох учиртай.

Гурван өдөр үргэлжилдэг их дуулгын хоёр дахь өдөр болсон нээлтийн ёслолын үйл ажиллагааны гэрэл зургийг эндээс үзээрэй.