Өвлийг утаагүй давахын тулд урд хөршөөс коксжсон нүүрс худалдан авах боллоо. Нийслэлийн иргэдийн төлөөлөгчид хотын дарга Д.Сумъяабазар, Эрчим хүчний сайд Б.Чойжилсүрэн нарын саналыг өчигдөр батлав. Харин НИТХ дахь ХҮН-ын гишүүд эсэргүүцсэн юм.

Мөн олон нийт, уул уурхайн салбарын мэргэжилтнүүд ч энэхүү гэнэтийн шийдвэрт эгдүүцэв. Тэгвэл БНХАУ-д төлөх 177 тэрбум төгрөг их мөнгө үү? Ийм хэмжээтэй мөнгөөр юу хийж болох вэ?

ХУВИЛБАР НЭГ

Энэ онд ашиглалтад орох сургууль, дотуур байр, цэцэрлэгийн тоо, тэдгээрийн төсөвт өртгийг БШУЯ танилцуулсан. 2023-2024 оны хичээлийн жилд нийслэлд 10 сургууль, 13 цэцэрлэг, хоёр цогцолбор барихад нийт 101 тэрбум төгрөг зарцуулна.

Хэдий хүн амын тоогоор дээгүүрт ордоггүй ч Хэнтий аймаг боловсролын салбарын хөрөнгө оруулалтаараа энэ онд аймгуудаас тэргүүлсэн. Тус аймагт гурван сургууль, гурван цэцэрлэг, дөрвөн дотуур байр барихад 40 тэрбум, Говь-Алтай аймагт нэг сургууль, шугам сүлжээ байгуулахад нийт 3.8 тэрбум төгрөг төсөвлөжээ.

Архангайд найман байгууламж барихад 22 тэрбум төгрөг, Сэлэнгэд 4.8 тэрбум төгрөг, Ховд аймагт 8 тэрбум төгрөг тус тус хуваарилсан байна.

Нийт 50 байгууламж барихад 176.6 тэрбум төгрөг зарцуулах юм.

ХУВИЛБАР 02

Зургаадугаар сард хуучин орон сууцны үнэ Сонгинохайрхан дүүрэгт хамгийн хямд буюу нэг метр кв нь 2.6 сая төгрөг байв. Ийм үнээр 60 метр кв талбайтай байр худалдан авахад нийт 156 сая төгрөг болно. 177 тэрбум төгрөгийг бүгдийг нь ипотекийн зээлийн санхүүжилтэд зарцуулсан бол 1134 өрх зээл авах байжээ.

Ийм тооны өрх 156 сая төгрөгийн үнэ бүхий хуучин байрыг ипотекийн зээлээ авах байв. Зургаан хувийн хүүтэй, ипотекийн зээл олголт ихээхэн буурсан. Энэ зээлийг авсан  өрхүүдийн эргэн төлөлтөөр л дараагийн зээлдэгчид зээл өгч байна.