Богд хааны ордон музейн Лавиран сүмийн танхимд "Хаан ордны намар-2021" музейн өдөрлөгийн нээлт боллоо. Нээлтийн арга хэмжээний үеэр "Хааны хачин" бэсрэг үзэсгэлэнг зохион байгуулж Богд хааны ордон музейн үзмэрийн дээжсээс толилуулав. Тухайлбал үзэгч олны сонирхлыг ихээхэн татдаг "Бодлоор зангидсан илд" үзмэрийг дэлгэлээ.

Энэхүү өдөрлөгийг Монгол Улсад музейн салбар үүсэн байгуулагдсаны 95 жилийн ой, Олон улсын ахмадын өдрийг угтан зохион байгуулж буй юм.

Иймд үзэгч, үйлчлүүлэгчдэд зориулан музейн тасалбарын үнийг хоёр хүний дунд нэг буюу 50 хувь, өндөр настан, хөгжлийн бэрхшээлтэй иргэд, зургийн тасалбарын үнийг 100 хувь чөлөөлжээ. Өдөрлөг аравдугаар сарын 1-7-ны өдрүүдэд үргэлжлэх бөгөөд музей 09:30-18:30 цагийн хооронд нээлттэй байна.

Амралтын өдрүүдэд тус музейн Манж цавын асарт "Бүжигчний нэгэн өдөр" залуучуудын бүжгийн тоглолтыг олон нийтэд толилуулан бие биелгээний сургалт зохион байгуулах аж. Мөн аравдугаар сарын 03-ны өдөр Богд хааны ордон музейн дэргэдэх дурсгалын цэцэрлэгт хүрээлэнд "Jazz City Revival" жазз хөгжмийн наадмын тоглолт болно.