Монголын Аутизмын Холбоонд өнөөдрийн байдлаар аутизмтай 800 орчим хүүхэд болон насанд хүрэгчид бүртгүүлсэн байдаг. Эдгээрээс 40 хувь нь сургуулийн өмнөх насных, 40 хувь нь сургуулийн насных буюу 6-16 настай байна.

Сургуулийн насны хүүхдүүд Ерөнхий боловсролын сургуульд хамрагдах нь эцэг эхчүүд, багш нарын төдийгүй нийгмийн анхаарах ёстой чухал асуудал юм.

Хэдийгээр хууль эрх зүйн орчин бүрдсэн ч амьдрал дээр тэгш хамруулалт бүрэн дүүрэн явагдахгүй байна. Аутизмтай хүүхдүүд ЕБС-д суралцахад олон бэрхшээл тулгарч байгаагийн хамгийн эхэнд багш нарын бэлэн бус байдал буюу аутизмтай хүүхэдтэй хэрхэн ажиллах, тохируулга хийх талаарх мэдлэг мэдээлэл дутуу байна гэж Монголын Аутизмын Холбоо дүгнэжээ.

Ингээд Монголын Аутизмын Холбооноос санаачлан Нээлттэй Нийгэм Форумын дэмжлэгтэйгээр “Аутизмтай хүүхдийг боловсролд тэгш хамруулах нь” төслийг хэрэгжүүлж, уг төслийн хүрээнд багш нарт зориулсан гарын авлагын туршилтын хувилбарыг бэлтгэсэн байна.

Энэ гарын авлага нь 3 бүлэгтэй: Эхний бүлэгт Аутизмын Хүрээний Эмгэг гэж юу вэ, Дараагийн бүлэгт Тэгш хамруулах боловсролын зарчим ба стратегиуд, Сүүлийн бүлэгт Аутизмтай хүүхдэд математик, унших бичих, нийгмийн ухаан, байгалийн ухаан, биеийн тамир, дуу хөгжим, зураг урлалын хичээл тус бүрийг хэрхэн заах тухай бичсэн байгаа. Мөн хавсралтаар аутизмтай хүүхэдтэй ажиллаж байгаа манай багш нарын туршлагаас кэйс хэлбэрээр оруулсан байна.

Гарын авлагыг бичихдээ АНУ-ын Фулбрайтын мэргэжилтэн Жоржия Их сургуулийн хүндэт профессор Пегги Галлагер багшийн лекц болон Австрали улсын эх сурвалж дээр голлон тулгуурласнаас гадна гадаадын болон монгол эцэг эхчүүдийн туршлагыг тусгасан юм.

Энэхүү гарын авлагын хэвлэлийг ННФ-аас гадна JCI Улаанбаатар байгууллага дэмжиж, нийт 1000 ширхэг хэвлүүлэн ЕБС-ийн, ангидаа аутизмтай хүүхэдтэй ажиллаж байгаа багш нарт үнэ төлбөргүй тарааж байна. Одоо энэ гарын авлагыг авсан багш нар аутизмтай сурагчтай ажиллахдаа ашиглаж, санал бодол, үнэлгээ дүгнэлтээ өгч, арга зүйн талаас сайжруулж эцсийн хувилбарыг боловсруулан гаргах учиртай аж.