Дэлхийн амьтны эрүүл мэндийн байгууллагаас антибиотикийг хүнд болон мал аж ахуйд хэрхэн зөв хэрэглэх талаар мэдээлэн, сургалт зохион байгууллаа. Судлаачдын хэлж байгаагаар 10 сая гаруй хүн 2050 онд зохисгүй антибиотикийн хэрэглээнээс шалтгаалан амиа алдах эрсдэлтэй. Үүний 50 хувь нь Ази, Номхон далайн орнуудад тохиолдох магадлалтай байгаа аж.
Хүний биед өвчин үүсгэгчийн 60 хувь нь нянгаас бүрддэг бол бидний хүнсэндээ ашигладаг малын өвчин ч үүнтэй адил шалтгаанаар үүсдэг аж.
Монгол Улсад нийт 5900 гаруй эм бүртгэснээс 14 хувь нь антибиотик буюу нянгийн эсрэг эм.
2018 оны хяналт шалгалтаар антибиотикийг жоргүй олгодог байсан эмийн сангийн тоо 70 хувиас 40 хувь хүртэл буурсан байна. Эмийг жортой олгож байгаа эсэхийг мэргэжлийн хяналтын байгууллага шалгадаг.
Мөн эмийн бүртгэл, импортын LICEMED цахим программыг бүрэн нэвтрүүлснээр жил бүрийн эмийн хэрэглээг хянах боломжтой болжээ.
Б.Энхжаргал