Ардчилсан Намаас сүүлийн үед үүсээд буй асуудлын талаар мэдээлэл хийж байна. Тэд АН-ын удирдлагад байсан, АН-ын гишүүнээс МАН-ын гишүүн болсон Ерөнхий сайд асан Н.Алтанхуяг, Ж.Батзандан нар мэдэгдэл хийж, гүтгэлэг тараасан гэв.

Төрийн албыг 60 тэрбумаар үнэлэн зарсан гэх хэрэг, Жижиг дунд үйлдвэрлэлийг хөгжүүлэх сангийн зээл, “Эрдэнэт үйлдвэр” ХХК-ийн 49 хувийн хувьчлал болон 51 хувийг эрх баригч МАН-ын нэр бүхий гишүүдийн хамгаалалт дор барьцаанд тавьсан зэрэг хэргүүдийг шүүхээр шийдвэрлүүлэн хариуцлага тооцох хэрэгтэй гэсэн байр сууриа тухайн мөч бүрт илэрхийлж байсан ч өнөөдөр АН-ын буруу мэтээр гүтгэлэг тарааж байна гэлээ. 

АН хууль бус үйлдэлтэй эвлэрэхгүй, өмгөөлөхгүй тул АН-ын жирийн гишүүд популистуудын гүтгэлгийн бай биш гэдгийг хэвлэлийн хурлаар дамжуулан хариуцлагатай мэдэгдэж байна гэсэн юм.

АН 1990 оны хувьсгал болон 1992 оны Үндсэн хуулийг батлуулсан улс төрийн хүчний хувьд ардчилал, хүний эрх, эрх чөлөө, гурав дахь хөрш гэсэн нийгмийн суурь үнэт зүйлээ хамгаалахын төлөө хатуу зогсох бөгөөд шүүхээр гэм буруутайг нь тогтоож, хариуцлага хүлээлгэх ёстой гэсэн байр сууриа дахин илэрхийлж байна гэв. 

АН-ын нарийн бичгийн дарга О.Магнай "МАН өнөөдөр албан ёсоор 64, албан бусаар 66 суудалтай болсон. Гэтэл ажил хийхэд АН саад болж байна гэж ярьж байна. Ийм суудалтай нам ажил хийж чадахгүй бол өөр хэн хийх юм бэ. Сар бүр хэвлэлээр ярьдаг шигээ шударга ёсоо тогтоо, хий хоосон популизм хийж, асуудал дээр давс цацаж иргэдийг турхирахаа боль. Бүлгийн дарга хийж байгаа Д.Эрдэнэбаттай холбоотой байр суурь байсан, АН-ын дарга С.Эрдэнэтэй холбоотой мэдээлэл байгаагүй. Хэрэв тухайн үед гэмт хэргийн шинжтэй үйлдэл хийсэн бол хэн ч байсан хариуцлага тооц. АН-ын гишүүн гээд бид өмгөөлөхгүй, хариуцлага тооц. АН-ын дарга байна уу, цэрэг байна уу, жирийн гишүүн байна уу хамаагүй, шударга ёсыг талд бид байх болно. АН ямар ч хулгай, луйврыг хамгаалахгүй, ард түмний эрх ашгийг нэгт тавих болно" гэсэн юм. 

Мөн тэрбээр "Сүүлийн үед ЗГХЭГ-ын дарга цагдаа, хууль, шүүхийн ажлыг хийгээд байна. Л.Оюун-Эрдэнэ гэмт хэргээр дагнан ажиллах хүсэлтэй бол ЦЕГ-ын дарга эсвэл Улсын ерөнхий прокурор болгомоор дүр зураг харагдаж байна. Хэн нэгэн албан тушаалтан орой бүр хүмүүсийг яллаж болохгүй. Шүүхээр гэмт хэрэг хийснийг тогтоогоогүй байхад ингэж яллаж болохгүй. Яллах ажил Л.Оюун-Эрдэнэд их зохиж байх шиг байна. Тиймээс эрх баригч нам Л.Оюун-Эрдэнийг АТГ, УЕП-ын даргаар тавибал дээр харагдаж байна гэлээ. Өнөөдөр хамгийн хурц шүд У.Хүрэлсүхэд байна, үүгээрээ дийлэхгүй бол явах хэрэгтэй.

Засгийн газар ажил хийж чадахгүй болохоороо орой бүр хүн ялладаг, нийгмийн сэтгэл зүйг хөөс рүү, бухимдал, гэмт хэрэг рүү чиглүүлж байгаа нь буруу. Сүүлийн гурван жил Монгол Улс хөдөлсөнгүй, хий доороо эргэлээ. Хийх ажил их байхад үндсэн ажлаа хийхгүй байна." гэдгийг онцоллоо.

Харин Ерөнхий сайд асан Н.Алтанхуягийн хийсэн мэдэгдлийн талаар тэрбээр "Н.Алтанхуягтай үл ойлголцсон асуудал байхгүй. Тэр хүн л буруугаар ойлгосон юм шиг байна. Н.Алтанхуяг намын даргын сунгаанд оролцож ялагдчихаад би ялагдвал бид бүгд ялагдана гэсэн байр сууриар өш хонзонгийн байдлаар хандаж байгаад АН-ын олон зуун жирийн гишүүд харамсаж байгаагаа илэрхийлсэн. Удахгүй хийсэн мэдэгдлийнхээ төлөө АН-ын гишүүдээс уучлалт гуйх байх гэж итгэж байна" гэсэн байр суурийг илэрхийллээ.