Хүнсний аюулгүй байдлын зөвлөлийн өнөөдрийн хуралдаанаар экспортлох адууны махны хэмжээг 10 мянган тн-оор нэмэгдүүлэхээр хурлаас шийдвэрлэлээ.

Тодруулбал, ирэх онд үхрийн мах 27900, адууны мах 33600 тн-ыг, харин хонь, ямааны мах экспортлох тоо, хэмжээнд хязгаар тогтоохгүй байхаар боллоо.

2017 оны арвандүгээр сарын 20-ны байдлаар манай улс нийт 21500 тн мах, махан бүтээгдэхүүн экспортлосон, үүний 80 хувийг адууны мах эзэлж байна. Хүнсний аюулгүй байдлын үндэсний зөвлөлөөс энэ 2017 онд 20 мянган тн адууны мах экспортлохоор тогтоосон, гүйцэтгэл нь 100 хувьтай байгаа юм.

 4218 тн хуурай сүү импортлоно, харин шингэн сүүний импортлохгүй

Мөн өнөөдрийн хуралдаанаар үйлдвэрийн аргаар бэлтгэсэн мах экспортлоход Монголын талаас шалтгаалах бэлтгэл арга хэмжээг шуурхай зохион байгуулж, экспортлогч аж ахуйн нэгжид мэргэжил-арга зүйн дэмжлэг үзүүлж ажиллахыг Мэргэжлийн хяналтын ерөнхий газрын дарга Н.Цагаанхүү, Гаалийн ерөнхий газрын дарга Б.Асралт нарт даалгалаа.

Ирэх онд хүнсний улаан буудай 225 мянга, үрийн улаанбуудай 10 мянган тн-ыг импортлоно. Мөн 4218 тн хуурай сүү импортлоно, харин шингэн сүүний импортлохгүй гэж Хүнсний аюулгүй байдлын үндэсний зөвлөлийн хуралдаанаас шийдвэрлэлээ.

Эх сурвалж: Засгийн газрын Хэвлэл мэдээлэл, олон нийттэй харилцах хэлтэс