Энхтайваны өргөн чөлөө буюу төв замаар зүүн гар тийш эргэх шийдвэрийг цуцалж, хуучин дүрмээрээ замын хөдөлгөөнд оролцуулах үүргийг Засаг дарга С.Батболд өглөө.

Нийслэлийн Засаг дарга С.Батболд автозамын түгжрэлийг бууруулах ажлын хэсгийнхэнтэй уулзаж буй бөгөөд зүүн эргэхийг хориглосон шийдвэрийг цуцлах үүргийг өгсөн юм.

Учир нь уг шийдвэр хүлээгдэж байсан буюу автозамын түгжрэлийг бууруулах зорилгодоо хүрээгүй гэж үзжээ.

Хотын даргын өгсөн үүргийг өнөөдөр ажлын хэсэг хэлэлцэж, хэзээнээс эхэлж зүүн гар тийш эргэж болох эсэхийг шийднэ.

Мөн хотын дарга ажлын хэсгийг ахлаж буй орлогч дарга Т.Баярхүүд ажлын хэсгээ өргөтгөн, мэргэжлийн хүмүүсээр багаа бүрдүүлэх, мөн Энхтайваны өргөн чөлөөгөөр байнга зорчдог иргэдийг нэмэхийг санууллаа.

Хотын төвийн долоон уулзвараар зүүн эргэхийг хориглосон шийдвэр наймдугаар сарын 15-наас эхэлсэн. Ерөнхий сайд өнгөрөгч долоо хоногт хотын удирдлагуудыг хүлээн авч уулзахдаа энэхүү шийдвэрээ эргэн харахыг, тооцоо судалгаатай хандахыг сануулж байсан билээ. 

Дашрамд сонирхуулахад, Монгол Улсын хэмжээнд өнөөдрийн байдлаар 876 мянга гаруй автомашин замын хөдөлгөөнд оролцож буйгаас 505 мянга орчим нь нийслэлд байгаа юм.