Улс төрийн эрхэм ноёдуудын маань суудал эзгүйрээд байна. Тэр дундаа нийслэл хотод төрийн түшээдийн бараа сураг нь ч харагдахаа байлаа. Нөгөө гудамжны хөдөлгөөн зогсоон сүртэй нь аргагүй хамгаалалттай давхилддаг хар машинууд үзэгдэхээ байсан нь үүнийг илтгэнэ. Өнгөрсөн долдугаар сарын эхээр УИХ-ын хаврын ээлжит чуулган завсарлаж, гишүүд тал тал тийшээ таран алга болцгоосон.

Удаа ч үгүй Засгийн газар ч хөдөө орон нутагт ажиллахаар болж, салбарын сайд нарынхаа хамт Ерөнхий сайд холын замд хүлгийн жолоогоо залсан байгаа. УИХ-ын гишүүд нь өөрийн сонгогдсон тойрогтоо ажиллах, гадаадад гарч мэдлэгээ дээшлүүлэх, төрийн өндөр уулзалт хийх, бусад оронтой хамтын ажиллагаагаа сайжруулах, судалгаа шинжилгээний ажлаа үргэлжлүүлэх гээд их л завгүй энд тэнд томилолтоор болон хувиараа аялаж, ажиллаж яваа. Харин Засгийн газрын гишүүдийн ихэнх нь Ерөнхий сайдаа дагаад хөдөө орон нутагт ажиллаж, үлдсэн хэд нь гадаад дотооддоо томилолтоор ажиллаж, багагүй ажил амжуулж яваа сурагтай дуулдаж буй.

Одоогоор Ерөнхий сайд С.Батболд салбарын сайд нараа тэргүүлэн баруун аймгуудад ажиллаж байгаа бол УИХ-ын дарга маань амралтаа авч, хотын зах хэсэгг цэвэр агаар уушиглан, цээж тэнэгэр зугаалж яваа гэнэ. Ангийнх нь нөхдүүд амарч байхад дарга нь амрахаас ч яах билээ. Нөхөд дотроо хамгийн өндөр настай Дэмбэрэл дарга маань бараг ирэх намрын чуулган хүртэл ажил албатай зууралдах сонирхолгүй байгаа аж. УИХ-ын дарга, Ерөнхий сайд хоёр эзгүй байх зуур Ерөнхийлөгч ч амралтаа авч, эмчилгээ сувилгаанд явж эхлэв. Хэвлэл мэдээллийн хэрэгслээр түүнийг шулуун гэдэсний хагалгаанд орж, эмнэлэгт хэвтэж байгаа гэж шуурч буй. Биеийн байдал нь ч давгүй гэж дуулдсан.

Өвчтэй ч бай үгүй ч бай эрхэм төрийн тэргүүн маань ямартаа ч амралтаа авч, эмчилгээ сувилалд орсон нь баттай аж. Саяхан Сонгдо эмнэлэгт албаны бус хувцастай явж харагдсан байна. Одоогоор хэзээ ажилдаа орж, улс эх орноо залах эсэх нь тодорхойгүй байгаа юм. Нэг мөр биеэ сайн тэнхрүүлж байж орох ч болов уу гэсэн бодол хүмүүсийн дунд байгаа. Тэгэхээр түүний биеийн тааллаар амралтын хугацаа мэдэгдэх нь.

Харин Засгийн газрын тэргүүн зөвхөн хөдөө орон нутагт ажиллах бус гэр бүлийнхээ хамт байгалийн сайхнаар аялж, зугаалж, танилцаж амрах зорилготой гэдгээ хэлсэн байгаа. Ингээд төрийн гурван өндөрлөгүүд маань төрийн ордноо орхиж, хэсэг зуур эзгүй орхив оо. Уг утгаараа гурвуулаа амарч л явна.