Нийслэлийн тээврийн газраас мэдээлэл өгч байна. Ирэх дөрөвдүгээр сарын 1-ний бямба гарагаас эхлэн хотын нийтийн тээврийн их багтаамжийн автобус, троллейбусны үйлчилгээнд зөвхөн цахим төлбөрийн хэрэгслийг ашиглах бөгөөд бэлэн мөнгийг хүлээн зөвшөөрөхгүй болох аж.

“Улаанбаатар смарт карт” ХХК-аас өнөөдрийн байдлаар хотын хэмжээнд нийтийн тээврийн карт цэнэглэх, борлуулах 480 цэгээр иргэдэд үйлчилж байгаа бөгөөд Дүнжингарав, Мишээл, Драгон нийслэлийн үйлчилгээний нэгдсэн төвүүдээс ХЯЗГААРГҮЙ зорчих эрхтэй сарын хугацаатай картуудыг авах боломжтой болох юм.

Хязгааргүй зорчих эрхтэй картыг ирэх даваа гарагаас худалдаанд гаргах бөгөөд Том хүн 25000, Хүүхэд 8000 төгрөгийн үнэтэй байх юм байна. Хэрвээ энэ картыг хаяж үрэгдүүлбэл карт дээрх дугаарын дагуу дахин авч болох бөгөөд ингэхдээ картын үндсэн үнэ болох 3000 төгрөгийг төлнө.

Өнөөдрөөс эхлэн энгийн болон хүүхдийн U money картын үндсэн үнийг хямдруулан 2000 төгрөгөөр худалдаалж эхлэх бол картын хэрэглээнд бүрэн шилжиж буйтай холбогдуулан автобуснуудад шалгалтын ажлыг зохион байгуулах аж.

Шалгалтаар төлбөр төлөөгүй зорчигч илэрвэл авто тээврийн хуулийн дагуу 5000 төгрөгөөр торгох эсвэл албадан ажил хийлгэнэ. 

Карт хүртээмжгүй, зарим иргэд худалдан авах боломжгүй учраас хотын захын дүүргүүдээр 20 мянган картыг үнэгүй тараах аж.

ХӨДӨӨ, ОРОН НУТГИЙН ИРГЭД:

Хөдөө орон нутгаас Улаанбаатар хотод түр ирж буй иргэдийн хувьд орон нутгаас ирсэн тээврийн хэрэгслүүд зогсдог авто терминалуудад байрлах Улаанбаатар Смарт Карт ХХК-ийн үйлчилгээний цэгээс түр картыг 3600 төгрөгөөр худалдан авна.

Ингээд хэрэглээндээ тохируулж цэнэглээд хотод байх хугацаандаа ашиглаж, буцахдаа тухайн картыг худалдан авсан цэгтээ буцааж өгөөд 3600 төгрөгөө эргүүлэн авах боломжтой юм байна.