Цаг уурын байгууллагаас өнөөдөр ихэнх нутгаар нойтон цас орж, цасан шуурах болох төлөвтэй байгаа талаар анхааруулсан.

Тэгвэл Увс, Завхан, Хөвсгөл, Баян-Өлгий, Говь-Алтай, Хэнтий, Баянхонгор, Ховд аймгийн нутгаар ихээхэн хэмжээний цас орсны улмаас иргэд төөрч алга болсон, осгож нас барсан тохиолдол гарчээ.

Тухайлбал, Завхан аймгийн Баянхайрхан сумаас Нөмрөг сум орохоор Портер загварын ачааны автомашинтай хоёр иргэн өчигдөр гараад сураггүй болсон тухай дуудлагын дагуу онцгойгийнхон ажиллаж сумын төвөөс 15 км-т “Сант толгойн-Ар” гэдэг газраас осгож нас барсан байдалтай олсон байна. 

Харин Говь-Алтай аймгийн Бигэр сумын Буудай багийн “Ямаан-Ус” гэдэг газар өвөлжиж байсан малчин Ц /57 настай, эмэгтэй/ малдаа яваад сураггүй болсон дуудлагаар эрэн хайх ажиллагаа зохион байгуулж, 22-ны өглөөний 04:00 цагийн орчим эсэн мэнд олж, ар гэрт нь хүлээлгэн өгсөн аж.

Одоогоор Увс аймгийн Улаангом сумын Баянхайрхан, Тариалан сумын Бургастай, Өмнөговь сумын Холбоо, Баян-Өлгий аймгийн Алтанцөгц суманд сураггүй болсон иргэдийн эрэн хайх ажиллагаа явагдаж байгаа юм.