Монголын үйлдвэрчний эвлэлийн холбооноос “Петровис”, “Шунхлай” ХХК шатахууны үнийг шалтгаангүй нэмснийг эсэргүүцэж, өнөөдөр мэдээлэл хийлээ.

Эдгээр компани өнгөрсөн амралтын өдрүүдэд шатахууны үнийг 50-100 төгрөгөөр нэмсэн байна. “Шатахууны үнийг нэмэх зайлшгүй шаардлага гарвал холбогдох эрх бүхий байгууллагуудад хандан хэлэлцсэний үндсэн дээр нэмэх ёстой байдаг. Гэтэл дээрх компаниуд зөвшилцөөгүй, иргэдэд ч анхааруулалгүй үнийг дур мэдэн нэмсэн. Энэ нь Өрсөлдөөний тухай хуулийг зөрчсөн” гэж МҮЭХ-ны тэргүүн Х.Амгаланбаатар хэлэв.   

Үүнтэй холбогдуулан тус холбооноос Засгийн газар, Ерөнхий сайдад санал, шаардлага хүргүүлнэ гэж мэдэгдэв. 

Шатахууны үнийг хууль бусаар нэмэгдүүлсэн тохиолдолд Өрсөлдөөний тухай хуульд зааснаар холбогдох компаний эздэд хариуцлага тооцож, хэрэглэгчдэд учруулсан хохирлыг барагдуулах ёстой байдаг аж.

Өнөөдрийн байдлаар импортоор оруулж ирж буй шатахууны 70 орчим хувийг цөөн тооны томоохон компанид бөөний үнээр нийлүүлж байна. Компаниуд шатахууны үнийг өөрийн дураар нэмж борлуулдаг нь шударга бус зүйл гэдгийг хэвлэлийн хурлын үеэр онцоллоо.

Г.Ариунзул