Өнөөдөр 18.00 цагаас эхлэн энэ сарын 20-ныг дуустал нийслэлд архи, согтууруулах ундаагаар үйлчлэх, худалдан борлуулахыг хориглох шийдвэр гарлаа.

Өчигдөр таван хүн хордлогын улмаас амиа алдсан. Хордсон зүйл нь архи байж болзошгүй хэмээн үзэж, шинжилгээнд өгөөд байгаа билээ.

Энэ хэрэгтэй холбоотойгоор шүүхийн шинжилгээний эцсийн дүн гартал ийнхүү хориг тогтоож байгаа гэдгийг Нийслэлийн Засаг даргын орлогч, нийслэлийн Онцгой комиссын орлогч дарга Ж.Батбаясгалан мэдээллээ.

Олон хүн хордлогод орсны улмаас амиа алдсан тул иргэдийн амь нас, эрүүл мэндийг хамгаалах үүднээс ийм шийдвэр гаргаж байна гэдгийг тэрбээр хэлсэн юм.

Өнөөдрийн байдлаар 7378 ширхэг архийг битүүмжилж, дээжийг шинжилгээнд өгсөн бөгөөд хариу гараагүй байна

Нийслэлийн Баянгол дүүргийн II хороонд өчигдөр амиа алдсан таван хүний шүүхийн шинжилгээний анхны дүгнэлтээр дөрөв нь шингэн зүйлээс болж хордсон гэж гарсан байна. Гэхдээ яг ямар зүйлд гэдэг хараахан тодорхой болоогүй гэдгийг цагдаагийн байгууллагаас мэдээлж байгаа юм. Энэ нь эд, эсийн шинжилгээгээр гарах тул хугацаа шаардлагатай байгаа аж.

Өчигдөр анхны дуудлага ирснээс хойш хэргийн газраас эд мөрийн баримт болон хураагдсан, сэжиг бүхий зүйлсийг хураах битүүмжлэх, хураах ажлыг нийслэлийн хэмжээнд Улаанбаатар хотын цагдаагийн газар болон Нийслэлийн мэргэжлийн хяналтын газар хамтран ажиллаж байна.

Хориг тавьж буй нь дахин хордлого гарах, иргэд хохирохоос урьдчилан сэргийлж буй ажил тул иргэд, аж ахуй нэгжүүд энэ тал дээр хариуцлагатай байхыг цагдаагийн байгууллагаас анхааруулав.

Харин нийслэлийн хэмжээнд үйл ажиллагаа явуулж буй 2959 архи, согтууруулах ундаа худалдан борлуулдаг дэлгүүрүүдээс 2013-д нь хяналт шалгалт хийж, тодорхой хэмжээний битүүмжлэх ажлуудыг хийгээд байна гэдгийг НМХГ-ын дарга Л.Эрдэнэчулуун мэдээллээ.

Өнөөдрийн байдлаар 7378 ширхэг архийг битүүмжилж, дээжийг шинжилгээнд өгсөн бөгөөд хариу гараагүй байна.