“Дээлтэй Монгол” наадам Сүхбаатарын талбайд эхэллээ. Энэ наадмыг 11 дэх жилдээ зохион байгуулж байна. Наадмын нээлтэд Улаанбаатар чуулгын уран бүтээлчид оролцож, “Улаанбаатарын магтаал”-аар наадмыг нээлээ.

Энэ наадам нь монгол түмний биет соёлын нэг хэсэг болсон үндэсний дээл хувцсыг гаднын жуулчдад таниулан сурталчлах, нийт Монголчуудыг үндэсний хувцсаараа бахархан гоёхыг уриалах гол зорилготой юм.

Наадмын үеэр хамгийн том Хүннү дээлийг үзэгчдэд танилцуулах бөгөөд үндэсний хувцас үйлдвэрлэгчдийн үзэсгэлэн худалдаа болох юм.