Америкийн уран бүтээлч Спенсер Туник Австралийн Сидней хотод дахин нэг удаа олныг хамарсан нүцгэн зураг авахаар төлөвлөжээ. Тэрээр мянга мянган сайн дурынхныг өөрийнхөө шинэ уран бүтээлийн зурагт орохыг урьж байгаа аж.

Гэрэл зурагчин Туник 2010 онд Сидней хотын Дуурийн театрын гадна талд 5500 орчим хүн оролцсон нэгэн томоохон бүтээлээ туурвисан бөгөөд одоо дахин тус хотод очиж арьсны хавдрыг олон нийтэд таниулах аяны хүрээнд шинэ бүтээлийн зургаа авах гэж байгаа гэнэ.

Тэрээр арьсны үнэ төлбөргүй үзлэг явуулдаг сайн дурын Skin Check Champions байгууллагатай хамтран арваннэгдүгээр сарын 26-нд Сидней хотын далайн эрэг дээр олон хүн цуглуулж нэг талаасаа урлагийн бүтээл, нөгөө талаас олон нийтийг мэдээлэлжүүлэх эрүүл мэндийн аян хийх аж.

Нүцгэн зураг авах амаргүй ажил бөгөөд олон мянган хүн нэг дор хувцсаа тайлна, хотын захиргаанаас Туникт хэрэг үүсгэнэ гээд бэрхшээл их тулгарч байв

Тус сайн дурын байгууллагын үүсгэн байгуулагч Скот Мэггс "Бид хамгийн багадаа 2000 хүн цуглуулна. 2010 оны гуравдугаар сард Сиднейн Дуурийн театрын гадна өглөө хүйтэнд авсан зураг авалтад 5500 хүн оролцож байсан бол одоо 2500 хүн хүргэх зорилго тавьж байна. Хүн болгоныг урьж байна. Бид ямар ч хүйсийн, ямар ч арьстай хүнийг арьсны хавдрын эсрэг аянд нэгдэхийг уриалж байна" гэжээ. 

Туник Мюнхен хотоос Мексико хот хүртэл төрөл бүрийн газар олныг хамарсан 100 орчим нүцгэн зураг авч байсан бөгөөд түүний уран бүтээлд нийт 18 мянган хүн оролцжээ. Гэвч нүцгэн зураг авах амаргүй ажил бөгөөд олон мянган хүн нэг дор хувцсаа тайлна, хотын захиргаанаас Туникт хэрэг үүсгэнэ гээд бэрхшээл их тулгарч байв.

Түүний энэ удаагийн бүтээл нь Австрали дахь дөрөв дэх зураг авалт болох бөгөөд сайн дурынхан "Strip Off for Skin Cancer"-т цахимаар бүртгүүлэх юм байна.

Эх сурвалж: CNN