Шувууны ертөнцийн хэний ч үл анзаарам торгон агшныг хальснаа буулгадаг зурагчин Л.Жаргалсайханы олон сонирхолтой бүтээлийг манай уншигчид андахгүй болсон байх.

Тэрбээр өчигдөрхөн Байгаль орчин аялал жуулчлалын яам болон Монгол орны UN-REDD үндэсний хөтөлбөрөөс зохион байгуулсан “Монгол орны ой 2016” уралдаанд “Гран при” шагнал хүртжээ.

Л.Жаргалсайхан уг уралдаанд “Ойн бяцхан эзэд” цуврал бүтээлээрээ тэргүүлсэн байна.

Шагнал гардсаныхаа дараа тэрбээр ”Өнөөдөр надад их таатай дурсамжтай өдөр байна. Би шувууны зураг аваад таван жил болж байна. Өмнө нь уралдаан тэмцээнд орж байгаагүй. Миний зургууд болоод тэмдэглэлийг гаргасан GoGo.mn сайтад талархлаа илэрхийлэхийн сацуу хамтран ажиллахад таатай байсныг энэ завшааныг ашиглан хэлье” гэв.

Зурагчин Л.Жаргалсайхан “Яагаад заавал шувууны зураг авдаг юм бэ” гэх асуултад,

-Шувуу бол байгалийн төгс бүтээгдэхүүний нэг. Энэ сайхан амьтныг хүүхэд, залуучууд гэлтгүй хүн бүр мэддэг болох нь чухал. Учир нь үүгээр дамжуулан байгаль орчин, эх дэлхийгээ хайрлаж эхэлдэг хэмээн хариуллаа.

Түүний шувуудын гайхалтай ертөнцөөр аялахыг хүсвэл ЭНД ДАРНА уу. Харин фликр цомог дахь бүтээлийг ЭНДЭЭС үзэх боломжтой.