Дарханы 10мвт нарны цахилгаан станцын албан ёсны нээлтээ энэ сарын 19-д хийнэ. Энэ нээлтийн ажил нь Дархан-Уул аймгийн Хонгор сумын нэгдүгээр багийн нутаг дэвсгэрт болох юм.

Тус станц нь ОХУ-аас импортоор авч байгаа эрчим хүчний хэмжээг багасгах, бүс нутгийг сэргээгдэх эрчим хүчний системд холбоход ихээхэн ач холбогдолтой.

Энэхүү нарны цахилгаан станцыг дотоодын “Solar power international”, Япон улсын “Sharp”, “Shigemitsu shoji” компани хамтран 17.5 сая ам долларын хөрөнгө оруулалтаар байгуулж байгаа аж.

Уг станц нь нийт 32274 ширхэг нарны модуны тусламжтайгаар жилд 14.1 сая квт эрчим хүч үйлдвэрлэнэ. Энэ нь 20 мянган өрхийг сэргээгдэх эрчим хүчээр хангах боломж бүрлэх юм хэмээн компанийн гүйцэтгэх захирал Б.Мандалбаяр ярилаа.

Нарны цахилгаан станц нь жилд 14746 тонн хүлэмжийн хий ялгаруулахаас сэргийлнэ.  Цахилгаан холболтын кабель нь манай орны 30-40 хэмийн хүйтэнд найдвартай, өндөр үр ашигтай ажиллах шаардлагыг хангана гэж тооцоолжээ.

                                                                                                           Л.Булганчимэг