Гоо сайхан, энх тайвны элчийг тодруулах "Дэлхийн мисс" тэмцээний титмийг Пуэрто Рико улсын гоо бүсгүй зүүж, Монголын мисс А.Баярцэцэг шилдэг 11 гоо бүсгүйн нэгээр шалгарч түүхэн амжилт тогтоолоо. 

АНУ-ын нийслэл Вашингтоны “MGM National Harbor” аялал жуулчлалын хүрээлэнд болсон энэхүү ёслолын ажиллагааны үеэр Индонезийн гоо бүсгүй гуравдугаар байранд, Доминиканы Бүгд Найрамдах улсын гоо бүсгүй дэд байранд шалгарлаа.

Шилдэг 11 гоо бүсгүйг тодруулсны дараа “People’s choice” буюу олон нийтийн санал асуулгаар тэргүүлсэн дахин нэг миссийг нэрлэх байсан бөгөөд энэхүү шалгаруулалтад А.Баярцэцэг шалгарсан юм. 

Тэрбээр илбэ болон каллиграфийн үзүүлбэрээр “Авьяаслаг мисс” шалгаруулалтад тэргүүлж, энэхүү ёслолын ажиллагаанд өөрийн үзүүлбэрээ “Дэлхий мисс”-ийн тайзнаа үзүүлсэн билээ.

А.Баярцэцэг авьяас чадвараараа манлайлан, хүмүүжил төлөвшил, зан чанар, өөрийгөө илэрхийлэх чадвараараа бусдын хайр хүндэтгэлийг хүлээж чадсан бөгөөд өөрийн зүгээс тэрбээр энэхүү тэмцээнд чадах бүхнээ маш сайн гүйцэтгэж чадсаны сацуу ард нь ажилласан баг хамт олон, түүнийг дэмжсэн монголчуудын санал томоохон амжилтад хүргэж чадлаа.

Дэлхийн мисс тэмцээний “Топ модель” шалгаруулах тэмцээнд БНХАУ-ын мисс шилдгээр шалгарсан бол “Спортлог мисс” тэмцээний төрөлд Күүкийн арлын гоо бүсгүй тэргүүлжээ. Мөн тус тэмцээний Мультимедиа төрөл буюу гоо бүсгүйчүүд хаана юу хийж байгаагаа цахимаар дамжуулж, олон нийтийн санал асуулга авах шалгаруулалтад Филиппиний гоо бүсгүй тэргүүлж шилдэг 20-д үлдсэн билээ. 

Дараах улсын гоо бүсгүйчүүд шилдэг 20-д шалгарлаа

1. Монгол
2. Хятад 
3. Филлипин
4. Словак
5. Франц 
6. Индонез
7. Гана
8. Бразил
9. Япон
10. Кени
11. Бельги 
12. Унгар
13. Доминикан 
14. Пуэрто рико 
15. Австрали 
16. Тайланд
17. Солонгос
18. Энэтхэг
19. АНУ
20. Күүкийн арал

Шилдэг 11 

1. Филиппин
2. Индонез
3. Бельги
4. Бразил
5. Кени
6. АНУ
7. Хятад
8. Доминиканы Бүгд найрамдах улс
9. Пуэрто Рико
10. Солонгос
11. Монгол

Шилдэг 5

1. Кени
2. Пуэрто Рико
3. Индонез
4. Доминиканы Бүгд найрамдах улс
5. Филиппин

Тэргүүн мисс Пуэрто Рико улсын мисс

Дэд байрын мисс Доминиканы Бүгд найрамдах улсын мисс

Гуравдугаар байранд Индонезийн мисс

Дэлхийн миссийн тэмцээнд үндэсний ялагч А.Баярцэцэг шилдэг 11 гоо бүсгүйн нэгээр шалгарч, түүхэн амжилт тогтоосонд баяр хүргэе!