Хотын төв цэгээс 35 км зайд орших Хүй долоон худагт байгалийн цасыг тогтоож, 500-800 метрийн урттай цана, чарганы гулгалтын талбайг тохижуулсан цанын баазыг байгуулсан талаар “Монгол наадам цогцолбор”-оос мэдээллээ.

Тус цанын бааз нэг дор 150 хүн хүлээн авах чадалтай бөгөөд иргэдийн ая тухыг хангах үүднээс дулаан гэр, халуун хоол цайгаар үйлчлэх юм.

Мөн зориулалтын мөсөн гулгуурын талбай, мөсний сурын талбай, морин чарга гээд олон төрлийн үйлчилгээг нэг дор авах боломжтой.

“Монгол наадам цогцолбор” ОНӨТҮГ нь Нийслэлийн Засаг даргын үйл ажиллагааны хөтөлбөрийн дагуу дээрх цанын баазыг байгуулаад байгаа бөгөөд иргэдэд тав тухтай үйлчилгээ, хямд үнийг санал болгоно гэдгийг тус газрын орлогч дарга Я.Болдбаатар мэдээлсэн юм.

Тус байгууллага Хүй долоон худагт жилийн дөрвөн улиралд тогтмол үйл ажиллагаа явуулахаар зорьж, олон төсөл хэрэгжүүлж байгаагийн нэг нь уг цанын бааз аж.

Цанын баазыг зорих иргэдийн тоог нэмэхийн тулд нийтийн тээврийн асуудлыг шийдэхээр ажиллаж байгаа талаараа тэрээр хэлэв. Тодруулбал, амралтын өдрүүдэд чиглэлийн автобус явуулахаар холбогдох байгууллагуудад хүсэлт илгээсэн байна.

Одоогийн байдлаар туршилтаар эхний үйлчлүүлэгчдээ хүлээн авч буй бөгөөд явцын дунд үнэ баталгаажиж, цаашид орчин үеийн цанын бааз хийхээр төлөвлөжээ. Цанын баазыг байгуулахад нийслэлийн төсвөөс мөнгө зарцуулаагүй бөгөөд аж ахуйн аргаар байгуулсан байна.

Дэлгэрэнгүй мэдээллийг UB Resort Фэйсбүүк хуудаснаас авна уу.