Өнөөдөр 09.00 цагийн байдлаар Авто тээврийн үндэсний төвийн Хөдөлгөөний удирдлага, хяналтын төвөөс бүх аймгуудтай холбогдон цаг агаарын мэдээ авахад “Цас орж шуурч байгаа газар байхгүй, хэвийн” гэсэн мэдээлэл өгчээ.

Мөн Онцгой байдлын ерөнхий газраас авсан мэдээллээр 2016 оны 11-р сарын 14-ний өдөр Зүүн аймгуудын нутгийн зүүн хэсгээр болон баруун аймгуудын нутгийн баруун хэсгээр бага зэргийн цасан болон шороон шуургатай, салхины хурд 5-10 м/с хүрнэ.

Иймд хөдөө орон нутагт зорчих зайлшгүй шаардлагатай тохиолдолд тээврийн хэрэгслийн техникийн бүрэн бүтэн байдлыг хангуулж, анхаарал болгоомжтой зорчиж, Автотээврийн үндэсний төвтэй гэрээ байгуулсан, хөдөлгөөний аюулгүй байдлыг бүрэн хангасан тээврийн хэрэгслээр үйлчлүүлэхийг анхааруулж байна.

Их хэмжээний цас орж, зам даваа хаагдан хальтиргаа гулгаа үүссэн тул өчигдөр 13.00 цагаас эхлэн Зам тээврийн сайдын тушаалаар улсын хэмжээний автозам байгууламжийг хааж, тээврийн хэрэгслийн хөдөлгөөнийг зогсоосон.

Цаг агаарын нөхцөл байдлаас шалтгаалан өчигдөр хаасан замыг өнөөдөр 10.00 цагаас нээж, хөдөлгөөнийг эхлүүлээд байгаа юм.