ХХААХҮЯ-ны сайд П.Сэргэлэн Тайванийн дэд сайдтай уулзсан байна. Тэд манай улсаас их хэмжээний чацаргана худалдан авах санал тавьсан байна. Гэвч тэдний худалдан авах хэмжээ манай чацарганы нийт ургацаас давжээ.

Тус яам ирэх дөрвөн жилд хэрэгжүүлэх “Чацаргана” хөтөлбөрийг боловсруулсан. Ядуурлыг бууруулах, иргэдийг ажлын байраар ханган, орлоготой болгох боломжийг нэмэгдүүлэх нь энэ хөтөлбөрийн гол зорилго. Мөн жижиг, дунд үйлдвэрлэлийг хөгжүүлэх зээл, хөтөлбөрүүдэд чацаргана тариалалтыг онцгойлон дэмжихээр төлөвлөжээ.

Увс аймгийн чацарганыг Францын холбогдох байгууллагуудаар дамжуулан газарзүйн баримжаатай бүтээгдэхүүнээр бүртгүүлэн, Европ руу экспортлох эхний шатны ажлуудыг хийсэн. Зарим аж ахуйн нэгж чацарганы тосыг Япон Улс, АНУ-д бага хэмжээгээр экспортолдог.

Ирэх онд чацарганы тариалалт, эрэлт хэрэгцээтэй холбоотой асуудлуудыг хэлэлцэх олон улсын томоохон хурлыг Монголд зохион явуулах хүсэлт ирсэн байна.