Монголын ноолууран хувцасны салбарт тансаг зэрэглэлийн цоо шинэ брэнд төрөн гарлаа. “Говь” ХК-ийн шинэ бүтээл болох энэхүү Yama брэндийн анхны коллекцийг дэлхийд алдартай Итали дизайнер зохион бүтээсэн байна. 

Монголоор "Ямаа" буюу бидэнд тансаг хэрнээ хамгийн дулаан ноолуурыг бэлэглэдэг амьтнаар нэрлэсэн бол японоор Yamá гэх үг нь "Уулын оргил" гэсэн утгатай. Ийнхүү нэрийдсэн шалтгаан нь дэлхийн масс зах зээлд хангалттай танигдсан “Говь” брэнд дараагийн шат руу ахиж, тансаг зэрэглэлийн ноолууран бүтээгдэхүүний зах зээлд хүч үзэхээр зорьж буйн илэрхийлэл юм. Тиймээс ч дэлхийн загварын том брэндүүд дээр ажиллаж байсан, 20 гаруй жилийн туршлагатай Итали дизайнерыг Yamá брэндийн анхны цуглуулга дээрээ ажиллуулжээ.

Ийнхүү шинээр төрсөн Yama Cashmere хэний ч урьд өмнө санал болгож байгаагүй тансаг мэдрэмжийг хэрэглэгчиддээ хүргэхийг зорьж, зөвхөн Шангрила Молл дэлгүүрийн 1-р давхарт байрлах салбараар худалдаалагдаж байна.

"Байгалийн яруу найраг" гэх нэртэй Yama брэндийн анхны цуглуулга маш сонгодог бөгөөд сүүлийн үед тренд болж буй туяанууд дээр төвлөрчээ. Хөх болон саарал өнгийг хад чулуунаас сэдэвлэж, үүл мэт цагаан өнгө, хул ба зэвний бор өнгүүд оруулснаас гадна пастель ягаан, дарсны хүрэн зэрэг сонирхолтой сонголттой гарсан байна. 

Минимал уур амьсгал, сул хийцтэй загварууд нь ямар нэг хээ, принтгүй болсон нь нүдэнд дулаахан, сэтгэл татагдам харагдуулж байлаа. Ерөнхийдөө Yama брэндийн анхны цуглуулгыг гардан бүтээсэн итали дизайнер иж бүрдлээр нь өмсөж болох загварууд гаргажээ. Энэ нь нэг төрлийн өнгө эсвэл материалаар дагнах total look моодонд орсон намрын улиралд маш цагаа олсон алхам болжээ.

Говь брэндээс танилцуулж буй Yama брэндийн анхны загварын шоу Шангри-Ла Улаанбаатар зочид буудалд арваннэгдүгээр сарын 4-нд амжилттай зохион байгуулагдаж өндөрлөсөн юм. 

Эх сурвалж: buro247.mn