Энэ сарын 25-29-ний өдрүүдэд Туркийн Үндэсний их хурлын дөрвөн гишүүн, нэг ёслолын ажилтан манай улсад айлчилж байна.

Турк-Монголын Парламентын Найрамдлын бүлгэмийн дарга, Мехмет Эрдоган төлөөлөгчдийг тэргүүлж байгаа юм.  

Тэд УИХ-ын дарга М.Энхболдод бараалхан, УИХ дахь Монгол-Туркийн Парламентын бүлгэмийн дарга, УИХ-ын гишүүн Т.Аюурсайхантай уулзана. Мөн Монгол УИХ-ын гишүүн, Батлан хамгаалахын сайд, Монгол-Туркийн Засгийн газар хоорондын эдийн засаг, худалдааны хамтарсан хорооны Монголын хэсгийн дарга Б. Бат-Эрдэнэ болон Туркэд Их, дээд сургууль төгсөгчдийн холбоо “АТА”-гийн гишүүдтэй уулзахаар төлөвлөжээ.  

Мөн Хархорин хот, Налайх дүүрэгт байрлах Түрэгийн эзэнт гүрний үеийн түүх, соёлын дурсгалт газруудад зочилно.

Төлөөлөгчид Монгол Улсад хийх айлчлалынхаа үеэр хоёр улсын хууль тогтоох салбарын харилцааг авч хэлэлцэж, улстөр, эдийн засаг, нийгмийн салбарт болж буй үйл явдлын талаар харилцан санал солилцоно.

Мөн долдугаар сард Турк Улсад болсон, төрийн эрхийг цэргийн хүчээр гартаа оруулахыг завдсан үйл явдлын талаар Монголын талд мэдээлэл өгөх аж.