Олон улсын хэмжээнд нэр хүнд цар хүрээ, зохион байгуулалтын хувьд шилдгүүдийн эгнээнд орж ирж байгаа  "Face of beauty International" гоо бүсгүйн тэмцээн Улаанбаатар хотноо эхэлж байгаа билээ.

Энэхүү тэмцээний албан ёсны хэвлэлийн хурал өнөөдөр болсон бөгөөд хуралд:

• "Face of beauty International 2016"  тэмцээнийг Монгол Улсад зохион байгуулах төслийн удирдагч,  "Монгол гоо сайхан" холбооны тэргүүн Ж.Анхбаяр,
• "Face of beauty International" тэмцээний санаачлагч үүсгэн байгуулагч Мила Мануэль,
• тэмцээний Монгол талын шүүгч П.Анужин,
• тэмцээний төслийн удирдагч А.Туяа,
• "Face of beauty international 2015" тэмцээний тэргүүн байрын шагналт, Унгарын мисс Далма Карман болон
• тус тэмцээний Miss Teen номинацийн ялагч 16 настай мисс Неллимарие Сото нар оролцлоо.

Тус тэмцээнийг Монгол Улсад зохион байгуулах төслийн удирдагч Ж.Анхбаяр:

"60 орны гоо бүсгүйчүүд цаг минут тутамд Монголыг гадаадад сурталчилж байна" гэлээ.

"Face of beauty International" тэмцээний санаачлагч үүсгэн байгуулагч Мила Мануэль:

"Дахин Монголд ирж байгаадаа сэтгэл өндөр байна. Зохион байгуулагч залуу хамт олондоо ажиллахдаа таатай байна. Тэмцээний зохион байгуулалт маш сайн. Эцсийн шалгаруулалтанд та бүхнийг хүрэлцэн ирэхийг урьж байна" гэлээ.

Тус тэмцээний Монгол талын шүүгч П.Анужин:

"Монгол Улсад болж байгаа түүхэн тэмцээнд эх орноо төлөөлж маш их хариуцлагыг хүлээж байна. Мөн өөрийн зүгээс нэр төрийн хэрэг гэж бодож байна. Тив дэлхийн гоо бүсгүйчүүдийг шалгаруулна гэдэг гадна талын үзэмж төдий биш. Энэ бол дотоод гадаад ертөнцийн нэгдэл юм. Гоо сайхнаар дамжуулж дэлхийд улс орноо сурталчлах маш том үйл ажиллагаа байдаг.

Тийм учраас Монгол Улсыг төлөөлж байгаа бүхий л хүмүүс  анхаарлаа хандуулж, дэмжиж, идэвхтэй оролцоно гэдэгт итгэлтэй байна.  Эх орноо төлөөлж шүүгчээр оролцож байгаагийн хувьд шударга шүүхийн төлөө, мөн дотоод гадаад ертөнцийн нэгдлийг дэлхий нийтэд таниулахын төлөө хичээнгүйлэн ажиллана гэдгээ та бүхэнд хэлмээр байна" гэлээ.

Дэлхийн 60 орны гоо бүсгүйчүүд оролцох энэхүү тэмцээний эцсийн шатны шалгаруулалтыг аравдугаар сарын 8-ны өдөр зохион явуулах бөгөөд тэмцээний ёслолын ажиллагааг манай улсаас гадна 10 гаруй улсад шууд дамжуулахаас гадна 300 гаруй жуулчид, гадны томоохон хэвлэл мэдээллийн байгууллагын сэтгүүлчид ирэх юм.

Энэ жилийн тэмцээн нь "Save the Mazaalai"  гэх уриайтагаар Монгол улсад устаж үгүй болох аюул нүүрлээд байгаа мазаалай баавгайг хамгаалах хөдөлгөөнийг дэлхийн сонорт хүргэхэд дуу хоолойгоо нэгтгэх зорилготойгоор зохион байгуулж байна. Тав дахь удаагийн уг тэмцээнийг байгль орчин, аялал жуулчлал, соёл урлаг, эдийн засгийн салбарт өнөр ач холбогдолтой хэмжээн зохион байгуулагчид үзэж байна.

Энэхүү тэмцээнд Монгол Улсаа төлөөлөн үндэсний ялагчаар Э.Урангоо оролцож байна. Тэрбээр "Universe best songs 2011" наадмын шилдэг 25 оролцогчийн нэг ба Сити их сургуульд маркетингийн менежер мэргэжлээр төгсчээ.

Тэрбээр "Мартагдашгүй намар" киноны гол дүрд тоглосон бөгөөд дуулдаг, бүжиглэдэг, өдөр тутмын хувцсаа өөрөө хийж өмсдөг зэрэг тал талын авьяас ур чадвартай. Спортод сонирхолтой бөгөөд шатрын улсын аварга, хүрэл медальтай юм.

GoGo.mn  мэдээний агентлаг нь тус тэмцээний хэвлэл мэдээллийн ивээн тэтгэгчээр ажиллаж байна.

Зургийг: О.Сүхбат